ଗୌରବର ମହା ମୋକ୍ଷ ୨୦୧୯

ଛଅଟି ଋତୁକୁ ଋତୁପର୍ଣ୍ଣା କରି

ବରଷ ଅଠର

ବିଦାୟ ନେଉଛି ଆଜି ।

ବର୍ଷ ଉଣେଇଶି ଦାଣ୍ଡ ଅଗଣାରେ

କଅଁଳ କଣ୍ଠରେ

ଡାକୁଛି ସୁରଭି ସାଜି ।

ପାର୍ଥିବ ସହିତ ଅପାର୍ଥିବ କେତେ

ଦୁଃଖ ଆଉ ସୁଖ

ଘଟଣା ପ୍ରମୁଖ ଯୋଡି ।

ବିଦାୟ ନେଉଛି ବରଷ ଅଠର

ଅଙ୍ଗେ ଅଙ୍ଗେ ତା'ର

ଅସ୍ତ ଅନୁଭୂତି ଛାଡି ।

ବିଦାୟୀ ବର୍ଷର ବିଦାୟ ଶୋକରେ

ସ୍ଥାବର ଜଙ୍ଘମ

ବ୍ୟଥିତ,ବେଦନାସିକ୍ତ ।

ନୂଆ ବରଷ ବି ପାଦ ଥାପିଲାଣି

ପୁରେ ପୁରେ ଶୁଭେ

ହସରୋଳ ଅବିରତ ।

ବିଦାୟୀ ବନ୍ଧୁର ବିଦାୟ ଦୁଃଖରୁ

ବଳି ପଡୁଅଛି

ଆଗମନର ଉତ୍କଣ୍ଠା ।

ଆଗନ୍ତୁକ ସାଜି ବର୍ଷ ଉଣେଇଶି

ସହରେ ବଜାରେ

ଖୋଜୁଛି ନିଜ ପ୍ରତିଷ୍ଠା ।

ହେ ବର୍ଷ ପ୍ରବର ପ୍ରବୀଣ ପ୍ରଖର

ତୀବ୍ର ତେଜସ୍ୱିନୀ

ଦୀପ୍ତିମନ୍ତ ରୂପ ନେଇ ।

ପୁରେ ପୁରେ ଦିଅ ସୁଖ ଶାନ୍ତି ପ୍ରୀତି

ପ୍ରେରଣା ଉଲ୍ଲାସେ

ପ୍ରଗତିର ଗୀତ ଗାଇ ।

ଶ୍ରଦ୍ଧାରେ ଶ୍ରଦ୍ଧାରେ ସ୍ୱାଗତ ସମ୍ଭାରେ

ଖଞ୍ଜିଅଛୁ ଆମେ

ତୁମ ଦିବ୍ୟ ଦରବାର ।

ଅଭିଷିକ୍ତ ହେବ ରାଜ ସିଂହାସନେ

ଏ ତୁମ ସାମ୍ରାଜ୍ୟ

କରିବ ହେ ଅକ୍ତିଆର ।

ମାନସ ମନ୍ଥିବୁ ବକ୍ଷ ରକ୍ତ ଦେବୁ

ଶ୍ରମ ଶକ୍ତି ଦେଇ

ସୂକ୍ଷ୍ମ ଚିନ୍ତାରେ ଚିନ୍ତାରେ ।

ଶିଳ୍ପୀର କୌଶଳେ ରଙ୍ଗ ଭରିଦେବୁ

ଗଢିବୁ ତୁମକୁ

ସୌର୍ଯ୍ୟ ବୀର୍ଯ୍ୟ ବିକ୍ରମରେ ।

ଇତିହାସ ବକ୍ଷୁ ସ୍ବର୍ଣ୍ଣାଭ ସ୍ଵାକ୍ଷର

ସାକ୍ଷୀ ରୂପେ ଆଣି

ସଜେଇବୁ ତୁମ ବକ୍ଷ ।

ତୁମେ ବର୍ତ୍ତମାନ, ସମୟ ମହାନ

ପ୍ରଗତି ମୈଦାନ

ଗୌରବର ମହା ମୋକ୍ଷ ।

ହେ ମାନବ ବନ୍ଧୁ ଅତୀତର କ୍ଷତ

ବାତ୍ୟା ବର୍ବରତା

ସବୁକୁ ପାଶୋରି ଦିଅ ।

ବର୍ତ୍ତମାନ ପାଇଁ ପବିତ୍ରତା ନେଇ

ନବାଗତ ବର୍ଷେ

ନିଜକୁ ନିୟୋଜି ଦିଅ ।

ବରଷ ବାସିବ, ତୁମେ ବି ହସିବ

ଉଲ୍ଲସି ଉଠିବ

ପ୍ରାନ୍ତ ଉପାନ୍ତ ଅଗଣା ।

ସେଇ ହେବ ଆମ ନୂତନ ଆଶାର

ସମ୍ଭ୍ରାନ୍ତ ସମୟ

ଆଭିଜାତ୍ୟର ପ୍ରଗଣା ।