ଏ ମନ୍ତ୍ରେ ଦୀକ୍ଷିତ ହେବା
ଏ ମନ୍ତ୍ରେ ଦୀକ୍ଷିତ ହେବା
ଆସ ଦେଶବାସୀ ,ଆସ ହେ ପ୍ରବାସୀ
ଏ ମନ୍ତ୍ରେ ଦୀକ୍ଷିତ ହେବା ,
ଗୋଟି ଗୋଟି କରି କୋଟି ହୃଦୟରେ
ଦେଶପ୍ରେମ ଜାଳି ଦେବା ।
ଆମେ ପରା ଏକ ମାଆର ସନ୍ତାନ
ଭାରତୀୟ ଆମ ଜାତି ,
ଏ କଥାଟି ସର୍ବେ କହିବା ଗୌରବେ
ସହାସ୍ୟେ ଫୁଲାଇ ଛାତି ।
କେତେ ଜନମର ପୁଣ୍ୟବଳ ଯୋଗୁଁ
ତା' କୋଳେ ହୋଇଛେଁ ଜାତ ,
ବୀର ପ୍ରସବିନୀ, ବିଶ୍ଵଗୁରୁ ଭାବେ
ସେ ସାରା ଜଗତେ ଖ୍ୟାତ ।
ଧର୍ମ,ରୀତି-ନୀତି,ସଭ୍ୟତା, ସଂସ୍କୃତି
ଯାହାର ଉତ୍କର୍ଷ ସଦା ,
ସେ ଆମ ଜନନୀ,ପୂଜ୍ୟ ମାତୃଭୂମି
ଭୁଲିଯିବା ନାହିଁ କଦା ।
ତା'ର ଉପାଦାନେ ଗଢ଼ା ଏ ଶରୀର
ପାସୋରି ନ ଯିବା ଲବେ ,
ପ୍ରତିଦାନେ ତେଣୁ କରିଯିବା କିଛି
ଯେତେଦିନ ଥିବା ଭବେ ।।