Library
ଧନ୍ୟ ଧନ୍ୟ ତୁ ଭୁବନେଶ୍ୱର
ଧନ୍ୟ ଧନ୍ୟ ତୁ ଭୁବନେଶ୍ୱର
ଖରାଦିନେ ପୋଡି
ବର୍ଷା ଦିନେ ବଢି
ଶୀତ ଦିନେ ଧୂଳି ମାଡ
ଧନ୍ୟ ଧନ୍ୟ ତୁ ଭୁବନେଶ୍ୱର !
ଗଛ ଗଲା କଟି
ଉଠିଗଲା ମାଟି
ଚକ୍ ଚକ୍ ପିଚୁ ରୋଡ
ଧନ୍ୟ ଧନ୍ୟ ତୁ ଭୁବନେଶ୍ୱର !
ଅଳିହା ନର୍ଦ୍ଦମା
କୁଢ କୁଢ ଜମା
ଆଖି ପାଉନାହିଁ ମୋର
ଧନ୍ୟ ଧନ୍ୟ ତୁ ଭୁବନେଶ୍ୱର !
ବେପାରୀଙ୍କ ରଡି
ଗାଆଁ ଗଣ୍ଡା ଛାଡି
ହେଇଛନ୍ତି ଏଠି ଠୁଳ
ସଭିଙ୍କୁ କିମିଆ କଲା ସହର !
ଲାଇନି କଟିବା
ପାଣି ସରିଯିବା
ପଡିଗଲାଣି ଅଭ୍ୟାସ ମୋର
ଧନ୍ୟ ଧନ୍ୟ ଏ ଭୁବନେଶ୍ୱର !
ଗାଈଗୋରୂ ପଲ
ହେଇ ମାଳ ମାଳ
ମାଗଣେ ଯୋଗାନ୍ତି ସାର
ଶସ୍ୟ ଶ୍ୟାମଳ ଭୁବନେଶ୍ବର ।
ମଦୁଆ ଗଞ୍ଜୋଡ
କରୁଥାନ୍ତି ଭିଡ
ନଦେଖି ବେଳ ଅବେଳ
ଧନ୍ୟ ଧନ୍ୟ ତୁ ଭୁବନେଶ୍ୱର ।
ଟ୍ରାଫିକି ପୁଲିସି
ସାଙ୍ଗରେ ସାଲିସି
ଚାଲେ ରୋଜଗାର ଭଲ
ଧନ୍ୟ ଧନ୍ୟ ତୁ ଭୁବନେଶ୍ୱର ।
ଚେକିଙ୍ଗି ନାଆଁରେ
ଚାଲିଛି ଏଠାରେ
ପଇସାର କାରବାର
ଧନ୍ୟ ଧନ୍ୟ ତୁ ଭୁବନେଶ୍ୱର ।
ଷ୍ଟ୍ରାଇକ୍ ଚାଲଇ
ଦିନରାତି ଏଠି
ରାଜନୀତିଆଙ୍କ ଭିଡ
ଧନ୍ୟ ଧନ୍ୟ ତୁ ଭୁବନେଶ୍ୱର ।
ବଡ ବଡିଆଙ୍କ
କେତେ ନାମ ଡାକ
ଖଟିଖିଆଙ୍କର କାଳ
ଧନ୍ୟ ଧନ୍ୟ ତୁ ଭୁବନେଶ୍ୱର ।
ଗାଡି ମଟରର
ଧୂଆଁରେ ସହର
ହୋଇଲାଣି ଝାଳ ନାଳ
ଧନ୍ୟ ଧନ୍ୟ ତୁ ଭୁବନେଶ୍ବର ।
ପରିବେଶ ପ୍ରେମୀ
କହନ୍ତି ଅବସ୍ଥା
ହୋଇବ ଯେ ଅସମ୍ଭାଳ
କିପରି ତିଷ୍ଠିବ ଏଇ ସହର ?
କୋଠା ପରେ କୋଠା
କେତେ ଗଢା ତୁଟା
ପୂରୁଛି ଧରାର କାଳ
ତା’ ପାଇଁ ଦାୟୀ ତୁ ଭୁବନେଶ୍ୱର !
ସୁନ୍ଦର ସହର
ଗଢୁ ଗଢୁ ଜୋର
ଦିଶିଲାଣି ତା’ କଙ୍କାଳ ହାଡ
ଆହା ମୋ ଭୁବନେଶ୍ୱର !
ଅଫିସ୍ କଲେଜ୍
ମଲ୍ ହୋଟେଲ୍
ଭିତରେ ହଜିଛି ସେଇ ସହର
ଯାହାର ନାଁଟା ଭୁବନେଶ୍ୱର !
ସରା ଭୁବନର
ଥିଲା ସେ ଈଶ୍ୱର
ଏବେ ଖାଲି ସେ ଭୁବନେଶ୍ୱର
ଆଉ ନାହିଁ ସେ ସ୍ୱପ୍ନ ସହର !
