ବିବର୍ଣ୍ଣା ଧରିତ୍ରୀ
ବିବର୍ଣ୍ଣା ଧରିତ୍ରୀ
ଦୁର୍ଦିନର ଦ୍ବାରଦେଶେ
ମହାପ୍ରଳୟର ଅଗଣାରେ
ଶୂନ୍ୟତା ଓ ହତାଶାର ଚକ୍ରବ୍ୟୁହ
ନିଥିର ନିଶ୍ଚଳ ପଙ୍ଗୁ ଓ ଅଥର୍ବ
ଶୌର୍ଯ୍ୟ- ବୀର୍ଯ୍ୟ- କାନ୍ତିହୀନ
ସୂର୍ଯ୍ୟ ,ଚନ୍ଦ୍ର ,ଗ୍ରହ ,ନକ୍ଷତ୍ର
ଜଳ ,ସ୍ଥଳ, ଆକାଶ
ମାଟି, ପାଣି ,ଓ ପବନ ।
କ୍ଷୁଧାରେ ଆତୁର ମଣିଷ
ନିତି ନିତି ପରିବର୍ତ୍ତନ
ନୂଆ ନୂଆ ଉଦ୍ଭାବନ
କମାଣର ଭୋକ,
ପୁଣି କେତେ ଗୁଳି ଗୋଳା
ବୋମା ବର୍ଷଣର ବିକଟାଳ ରୂପ ।
ସଭ୍ୟ ସୁଶିକ୍ଷିତ ଭଦ୍ରମୁଖା ମଣିଷ
ଅଜ୍ଞତାର ରେଶମୀ ପୋଷାକ ତଳେ
ଦୁଃଖେ ଜର୍ଜରିତା ସର୍ବଂସହା ବସୁନ୍ଧରା ,
ଅଥଚ, ପ୍ରତିକ୍ରିୟାହୀନ
ନିଷ୍କ୍ରିୟ,ନିର୍ବାକ ଓ ନିସ୍ତେଜ ।।
ଚିର ବନ୍ଦିନୀ ଏ ସବୁଜ ବନାନୀ
ଔଧତ୍ୟର ବିଷ ବଳୟ ଘେରରେ ,
ପରିବେଶ, ପରିସଂସ୍ଥା ଓ ଜୈବବିବିଧତା
ସଂକ୍ରମିତ ଭୀତତ୍ରସ୍ତ
ଧୂଆଁ ଧୂଳି କେତେ ବିଷାକ୍ତ ବାଷ୍ପର
ଆତଙ୍କବାଦୀ ଆକ୍ରମଣ ରେ ।
ପ୍ରଚଣ୍ଡ ଗ୍ରୀଷ୍ମ ର ଲେଲିହାନ ଶିଖା
କାଳବୈଶିଖୀର କରାଳତା
ବିପର୍ଯ୍ୟସ୍ତ ଏ ଜୀବଜଗତ
ପ୍ରାକୃତିକ ରୁ ଅପ୍ରାକୃତିକ
ଅମୃତ୍ୟୁରୁ ମୃତ୍ୟୁ ର ସଂଧାନ ,
ଆଧୁନିକତାର ଚରମ ପିପାସା
ପ୍ରାକୃତିକ ସମ୍ପଦର ଦିଶାହରା ଶୋଷଣ
ଖଣିଜ ପଦାର୍ଥ ର ଭାରସାମ୍ୟହୀନଉତ୍ତୋଳନ
ଯୋଜନ ଯୋଜନ ଦୂରତା
ଆଦିମତାରୁ ଉଗ୍ର ଆଧୁନିକତା
ଯକ୍ଷ୍ମା ,କର୍କଟ, ହୃଦଘାତର କରାଳ ବିଭୀଷିକା
ବଂଚିବାର ସବୁରାସ୍ତା ବନ୍ଦ ।।
ପରିବେଶ ସୁରକ୍ଷା ସୁଦୀର୍ଘ ବିକଳ୍ପ
ପାଦପ ରୋପଣେ ଜୀବନ ରକ୍ଷା
ବିପର୍ଯ୍ୟସ୍ତ ବିଦୀର୍ଣ୍ଣ ପୃଥିବୀ ର ନବ ଉନ୍ମେଷ
ଅସଚେତନତାରୁ ସଚେତନତା
"ପୋଷଣୀୟ ବିକାଶ"ର ଯାଦୁକାରୀ ମନ୍ତ୍ର
ସବୁଜ ଶ୍ୟମଳିମାର ମହାର୍ଘ ସମ୍ଭାର
ଏକ ନୂତନ ସୂର୍ଯ୍ୟଦୋୟ
ସମ୍ଭାବନା ନୂଆ ସକାଳର
କୁଳୁକୁଳୁ ସ୍ବର ପାହାଡିକନ୍ୟାର,
ବିହଙ୍ଗ କୂଜନର ମଧୁରତା
ବଂଚିବାର ନୂଆ ଏକ ରାସ୍ତା ,
ଚିର ଶାଶ୍ବତ ଅମୃତର ବର୍ଷା
ଧ୍ବଂସୀଭୂତ କୁଢ କୁଢ ହାଡ ଓ ମାଂସ ରୁ
ସୃଜନର ମଧୁର ମୂର୍ଚ୍ଛନା
ମୃତ୍ୟୁ ରୁ ଅମୃତ୍ୟୁକୁ ଯାତ୍ରା
ହେଉ ଆଜିର ଅନୁଚିନ୍ତା !!
-------------------------------
("ବିଶ୍ବ ପରିବେଶ ଦିବସ" ଉପଲକ୍ଷେ ଏ କବିତା ଟି ରଚିତ।)
ଅଧ୍ୟାପକ ଶରତ କୁମାର ଦାସ
ବଡବିଲ ମହାବିଦ୍ୟାଳୟ, ବଡବିଲ,କେନ୍ଦୁଝର।