ପରମାଣୁ ପ୍ରତିଯୋଗିତା ଚାଲିଚି

ପରମାଣୁ ପ୍ରତିଯୋଗିତା ଚାଲିଚି

 

ପର୍ଶୁରାମ ବିଶ୍ୱାଳ

 

ପରମାଣୁ ପ୍ରତିଯୋଗିତା ଚାଲିଚି, କିଏ ବଡ଼ ହବ ବୋଲି

ବିଶ୍ୱ ପରିବେଶ ନଷ୍ଟ ହବା କଥା ସଭିଏଁ ଗଲେଣି ଭୁଲି

ଇମିତି ଭାବନା ରଖିଲେରେ ଜଗା

ଏ ବିଶ୍ୱ ନଥିବ କାଲି ।

 

ଅଙ୍ଗାରକାମ୍ଳର ମାତ୍ରା ବଢ଼ିଯାଏ, ଓଜୋନରେ ଆଜି ଫାଟ

ସୂରୁଯ ଦେବତା ବାଇଗଣୀ ରଶ୍ମି ଆସିବା ପାଇଁ ସେ ବାଟ

କେତେ ନୂଆ ରୋଗ ମାଡ଼ିଆସେ ଆଜି

ହେଉ କଲବଲ ଖାଲି ।

 

ଆଜି ପରିବେଶ ଗଲାଣି ବିଗିଡ଼ି, ଆତଙ୍କିତ ବିଶ୍ୱବାସୀ

ଉତ୍ତାପ ବଢୁଚି ଆଣ୍ଟରାଟିକାରେ, ବରଫ ତରଳି ଭାସି

ସମୁଦ୍ରର ଜଳସ୍ତରଟି ବଢୁଚି

ହିସାବ ହୁଏନା କଳି ।

 

କଳକାରଖାନା ଆବର୍ଜନା ପାଇଁ ନଦୀଜଳଟି ଦୂଷିତ

ଭୂତଳ ଜଳଟି ସରି ସରି ଯାଏ, କି କରିବ ଏ ଜଗତ

କାହାକୁ କଅଣ କିଏସେ କହିବ

ଏକକୁ ଆରେକ ବଳୀ ।

 

ଯଥା ସମୟରେ ଆସୁନାହିଁ ଖରା, ବର୍ଷା, ଶୀତ ଏବେ ଆଉ

ବନ୍ୟାର ପ୍ରକୋପ ବଢ଼ିଯାଏ କାହିଁ ବାତ୍ୟା, ମରୁଡ଼ିର ଦାଉ

ଭୂକମ୍ପ, ସୁନାମି ମାଡ଼ିଆସେ କାହିଁ

ତା କରାଳ ରୂପ ମେଲି ।

 

ସବୁ ବଡ଼ ଶକ୍ତି ବୁଝେଇ ଚେତେଇ କହିବୁ ଆରେ କାଳିଆ

ବିଶ୍ୱ ପରିବେଶ ରଖନ୍ତୁ ସଜାଡ଼ି, ନଲଗାଇ ସେଠି ନିଆଁ

ଜଗତ ନଥିଲେ କେ’ କାହିଁ ଲୋଡ଼ିବ

ତୋର ସେ ଶରଧାବାଲି ?

 

ଗ୍ରା.-ମିତ୍ରସେନପୁର, ପୋ.ଅ.-ଗମୁଁ

ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪

ଫୋନ୍-୯୮୫୩୭୫୯୭୦୦

*****