ମାଆ ପରି କିଏ ହବ
ମାଆ ପରି କିଏ ହବ
ମାଆ ପରି କେହି ନାହିଁ ଏ ଜଗତେ
ଭାବନାର ଅନ୍ତରାଳେ ,
ମାଆର ବିକଳ୍ପ ସତେ ଅସମ୍ଭବ
ଏତେ ବଡ ମହୀତଳେ !
ମାଆର ପଣତ ସୁରକ୍ଷା କବଚ
ବିପଦକୁ ଟାଳି ପାରେ ,
ମାଆ ପାଶେ ଥିଲେ ଫୁଲ ବର୍ଷା ହୁଏ
ବିଷରୁ ଅମୃତ ଝରେ !
ମାଆ ଆଶୀର୍ବାଦ ଶୁଭ ପ୍ରଦାୟକ
ଆହା କି ଏ ଭାବମୟ ,
ସବୁ ଅସମ୍ଭବ ହୁଅଇ ସମ୍ଭବ
କାହାକୁ ନ ଥାଏ ଭୟ !
ମାତା ଗର୍ଭ ଧାରୀ ବ୍ରତ ଉପଚାରି
ମଙ୍ଗଳ ବିଧାନ କରେ ,
ବାରମାସେ ତେର ପାଳଇ ପରବ
ଉପବାସେ ଦିନ ସରେ !
ଯେତେ ଦୂରରେ ଥିଲେ ଶୁଭ ସେ ମନାସେ
ସନ୍ତାନର ସୁଖ ପାଇଁ ,
ଫେରିଲା ବାଟକୁ ରହିଥାଏ ଚାହିଁ
ନିଦ ଜମା ଶୁଏ ନାଇଁ !
ଆଖିରେ ସପନ ଫେରିନି ମୋ ଧନ
ମାଆ କରେ ଗୁଣ ଗାନ ,
ମାଆ ଜାଣିପାରେ ଏ ଭବ ସଂସାରେ
ଅନ୍ତର ବେଦନା ଜାଣ !
ଯାତନା କବଳେ ମାଆ ଲୁହ ଢାଳେ
କରେ ନାହିଁ ପ୍ରତିବାଦ ,
ସନ୍ତାନର ସୁଖ ଏକମାତ୍ର ଲକ୍ଷ୍ଯ
କରେ ସିଏ ଫଳପ୍ରଦ !
ରୋଗ ଦୁର୍ବିପାକ ମାଆ କରେ ଦୂର
ମନ୍ଦିରରେ ଦୀପ ଜାଳି ,
ରାତି ଉଜାଗରେ ସେବା କେତେ କରେ
ପ୍ରୀତିର ପରଶ ଢାଳି !
ମାଆ ଚିହ୍ନେ ପେଟ ନକରି ଆକଟ
ଅମୃତ ମଣୋହି ଦେଇ ,
ମାଆ ପରି କିଏ ହବ କୁହ ସତେ
ସ୍ଵାର୍ଥରୁ ଊର୍ଦ୍ଧରେ ରହି !
ମାତା ଗର୍ଭ ଧାରୀ ସ୍ୱୟଂପୂର୍ଣ୍ଣା ନାରୀ
ଏ ସୃଷ୍ଟିରେ ବୈଚିତ୍ର୍ୟମୟୀ ,
ଦଶ ମାସ ଧରି ଉଦର ସମ୍ଭାଳି
ହୋଇ ଥାଏ କାଳଜୟୀ !
ହେ ସନ୍ତାନ ସନ୍ତତି କରୁଛି ବିନତି
ମାଆକୁ ଦେବନି ଦୁଃଖ ,
ଏ ରମ୍ୟ ସୃଷ୍ଟିକୁ ଆଣିଛି ଆମକୁ
କେତେ ବଡ ତା'ର ତ୍ୟାଗ !
ମାତୃ ଦିବସର ଶୁଭ ଅବସରେ
କର ହେ ପ୍ରତିଜ୍ଞା ସର୍ବେ ,
ମାଆକୁ ସମ୍ମାନ ରମ୍ୟ ଉପହାର
ସମର୍ପିବା ଖୁସି ରବେ !
ସଦାନନ୍ଦ ସାହୁ , ଧୁରୁସିଆ , ଆଠଗଡ କଟକ