Library
ବେପାରର ଗୁରୁମନ୍ତ୍ର
ବେପାରର ଗୁରୁମନ୍ତ୍ର
ମୁଣ୍ଡେ ହାତ ଦେଇ ବସିଅଛି ପୁଅ
ମାନ୍ଦା ବଡ ବ୍ୟବସାୟ
ମଅଲ ଯୁଗରେ, କେବିନୁ ଜିନିଷ
କିଏ ସେ କିଣୁଛି କୁହ !
ବୁଝୁନାନ୍ତି ବାପା ଯୁଗ ଏବେ ଯାଇ
କୋଉଠି ପହଞ୍ଚିଲାଣି
ଦି’ ଟଙ୍କା ଜିନିଷ କେ’ ନେବ, ଲୋକଙ୍କ
ପାଖେ ଅଛି ଟଙ୍କା ଖଣି !
ରାଜଧାନୀ ସାରା ବିଛେଇ ପଡିଛି
ସ୍ମଲ୍ ବିଗ୍ ର ବଜାର
ରଙ୍ଗ ବେରଙ୍ଗର ଲାଇଟ୍ ଜଳେଇ
ବଢାନ୍ତି ସେ କାରବାର ।
ଶହେ ଦୁଇ ଶହ ବିକିରି କରିକି
କେମିତି ଚାଲିବ ଗାଡି
ଛ’ ପ୍ରାଣୀ କୁଟୁମ୍ୱ ଭୋକ ଉପାସରେ
ନିତି ଛାଡୁଛନ୍ତି ରଡି ।
ଚକମକ ଭରା ରୂପଭେକ ଲୋଡା
ଗ୍ରାହକ ଆକର୍ଷିବାକୁ
ଭଙ୍ଗା କେବିନି କୁ, ରଙ୍ଗଛଡା ଡବା
କିଏ ଆସିବ ଏଠିକୁ ?
ଦିନ ଥିଲା ଲୋକ ଦଶ ଟଙ୍କା ଧରି
ଆସୁଥିଲେ ବଜାରକୁ
କେବିନି ଦୋକାନ ବଳି ପଡୁଥିଲା
ସେତେବେଳେ ମଅଲଠୁ ।
ରାଜଧାନିଆଙ୍କ ପକେଟ ଏବେ ତ
ଓଜନେ ପଡୁଛି ଝୁଲି
ଗାଡିରୁ ଓହ୍ଲେଇ ମଲ୍ ଭିତରକୁ
ଯାଉଛନ୍ତି ହଲି ହଲି ।
'ଅତି ଆବଶ୍ୟକ’ କିଛି ନାହିଁ ଆଉ
ସବୁ ହୁଏ କିଣାକିଣି
ଏମିତି ବେଳରେ କିଏ ବା କାହିଁକି
ଏଠିକୁ ଆସିବ ଟାଣି !
ମୁଚୁକି ମୁଚୁକି ବାପା ହସୁଅଛି
ଶୁଣିକି କଥା ପୁଅର
ଦି’ ଚାରି ଦିନରେ ଅଥୟ ହୋଇଲେ
କେମିତି ଚାଲିବ ଘର ?
କାହାରି ଭାଗ୍ୟରେ ପୂର୍ଣ୍ଣମୀର ରାତି
ନରହେ ଯେପରି ନିତି
ଅନ୍ଧକାରଟା ବି ସେମିତି ଉଭାଏ
ପ୍ରକୃତିର ଇଏ ନୀତି ।
କେବିନ ଆମର ଭଙ୍ଗାତୁଟା ସିନା
ହେଲେ ଜାଣିଥା ରେ ପୁଅ
ଏମିତି ବିକିରି ହେବ ବସିବାକୁ
ପାଇବୁ ନାହିଁ ସମୟ ।
ଲୋଅର ପି.ଏମ୍.ଜି ଛକ ଯେ ଏଇଟା
କୁବେରଙ୍କ ଜନ୍ମସ୍ଥାନ
ବଡ ଠାରୁ ଛୋଟ, ସବୁ ଲୋକଙ୍କର
ଏଠିକୁ ହୁଏ ଗମନ ।
ବିଧନସଭାର ଅଧିବେଶନଟା
ଆରମ୍ଭ ତ ହେଇଯାଉ
ଦେଖିବୁ କେମିତି ଗାଆଁ ଗଣ୍ଡୁ ଲୋକେ
ହେବେ ଏଠି ହାଉଯାଉ ।
ଧାରଣା ଉପରେ ଧାରଣା ଚାଲିବ
ଏକ ସଙ୍ଗେ ଦିନରାତି
ପୁରୁଷ, ମହିଳା ସବୁ ଜମା ହେବେ
ଚାଲିବ ଆଖଡା ନିତି !
ସାମ୍ୱାଦିକଙ୍କର ଜମଘଟ ହେବ
ଟିଭିରେ ଆସିବ ଫଟ
ଗଳାଫଟା ରଡି କେତେ ତୁ ଶୁଣିବୁ
ଦେଖିବୁ ବି କେତେ ନାଟ ।
ଏଇଠି ଖାଇବା, ଏଇଠି ପିଇବା
ଏଇଠି ହେବ ରହଣୀ
ଅଧିବେଶନର ସମୟେ ଫୁର୍ସତ
ପୁଅ ଜମା ମିଳିବନି !
ବିଧାନସଭାର ଭିତର ବାହାର
ହୋଇବ ଯେତେ ଗରମ
ଆମ କେବିନିର ଚା’ ପାନ ବିଡି
ଯୋଗାଇବ ଉପଶମ ।
ବିରୋଧିବାଲାଙ୍କ ଯେତେ ଉଚ୍ଚ ସ୍ୱରେ
ସର୍କାର ବିରୋଧି ହେବ
ମୋ ହାତ ସାଙ୍ଗକୁ ଚାହା ବାସନ ବି
ସେତିକି କଳା ହୋଇବ ।
ଯୋଉ କେବିନିଟା ଭଙ୍ଗାତୁଟା ବୋଲି
ନାକ ତୋର ଉଠେ ଖରେ
ତାହାରି ଦୟାରୁ କୋଠା ମୋର ଠିଆ
ରାଜଧାନୀ ଛାତି ପରେ ।
କେଇଟା ଦିନ ତୁ ଅପେକ୍ଷା କରିଯା
ଖୋଲିଯିବ ଭାଗ୍ୟ ତୋର
ମାଟି ଗୋଡି ଆଣି ଯାହା ଥୋଇଲେ ବି
ହେଉଥିବ କାରବାର ।
ସେତେବେଳେ ଭଙ୍ଗା କେବିନ ହୋଇବ
ମଅଲ ଠାରୁ ବି ବଡ
ଶାଢି ଚୁଡି ପାଣି ବିସ୍କୁଟ ଅମୁଲ
ଦୋକାନେ ଲାଗିବ ଭିଡ ।
ଗାଆଁକୁ ଫେରିଲା ପୂର୍ବରୁ ସଭିଏଁ
ନେବେ କିଛି କିଛି ବୋହି
ସେସବୁ ପାଇଁକି ବଡ ବଜାରକୁ
କେହି ଜମା ଯିବେ ନାହିଁ ।
ବର୍ଷକର ହେବ ରୋଜଗାର ପୂରା
କେଇଟା ଦିନ ଭିତରେ
ତା’ପରେ ଦିନକୁ ଶହେ ଟଙ୍କା ପାଇ
ଚିନ୍ତା ନକରିବୁ ବାରେ ।
ଏ ତ ମହାମନ୍ତ୍ର ଅଟେ ବେପାରର
ମନେ ରଖିବୁ ତୁ ମଲାଯାଏଁ
ପ୍ରାର୍ଥନା କରିବୁ ସଭାଟା ଯେପରି
ଅଧାରୁ ଭଙ୍ଗ ନହୁଏ !
-0-
