Library
ମିତ ପାଇଁ ଗୀତ
ମିତ ପାଇଁ ଗୀତ
ବାଡି ଖଣ୍ଡେ ବୋଲି ଗବ ବାଡି ଖଣ୍ଡେ
ହାତୁ ନଛାଡିବ କ୍ଷଣେ
ଶତ୍ରୁକୁ ଆଣ୍ଟେ ପାଣିକୁ କଣ୍ଟେ
ସଂଗେ ହୋଇଥିବ ଜଣେ ।
ବାଡି ଖଣ୍ଡେ ଯଦି ଏତେ ବଡ ସାଥୀ-
ସାଥୀ କଥା କି କହିବା
ସାଥୀ ହୀନ ଜନ ପଶୁଠାରୁ ହୀନ
ଶିରରେ କର ମାରିବା ।
ଭଲକୁ ପ୍ରଶଂସା ସମାଜ କରିବ
ଭୁଲ କଲେ ନିନ୍ଦା ଦେବ
ସାଥୀଟିଏ କିନ୍ତୁ ଦେହାତୀତ ଯାଏ
ଗୁଣଗାନ କରୁଥିବ ।
ଦରିଦ୍ର ସୁଦାମା ଖୁଦଭଜା ଧରି
ଦ୍ଵାରକାରେ ପହଂଚିଲେ
ପାଦଧୌତ କରି ସିଂହାସନେ ରାଇ
କୃଷ୍ଣ ଅରଚନା କଲେ ।
ଛଡାଇ ଖାଇଲେ ଖୁଦଭଜା
ଅଷ୍ଟ ପାଟ ବଂଶୀ ଆଚମ୍ବିତ
ବଂଧୁତ୍ୱ ବୁଝେନା ଧନ ମାନ ଭେଦ
କଂଧେ ଥାଉ ଉପବୀତ ।
ବିପଦର ବଂଧୁ ବାସ୍ତବରେ ବଂଧୁ
ପିତା ମାତା ସହୋଦର
ଛାୟା ପରି କାୟା ଦିଏ ଅର୍ଦ୍ଧାଂଗିନୀ
ସାଥୀ ଜନ୍ମ ଜନ୍ମାନ୍ତର ।
ରବିଙ୍କ ଦକ୍ଷିଣାୟନେ କମଳିନୀ
ଝାସଦେଇ ହୁଏ ସତୀ
କେତେ ଦୂରେ ଚନ୍ଦ୍ର କାହିଁ କୁମୁଦିନୀ
ଅଭେଦ୍ୟ ତାଙ୍କର ପ୍ରୀତି ।
କର୍ଣ୍ଣ ମହାବୀର ଦୁର୍ଯ୍ୟୋଧନ ସଖା
ଲାଗି ଅନ୍ୟାୟର ସାଥେ
ମରଣକୁ ପଛେ ବରଣ କରିଲେ
ଛାଡିଲେନି ଅଧା ପଥେ ।
ସାଥୀ ବିନା ନାହିଁ ଜୀବନର ମୂଲ୍ୟ
ସାଥୀକୁ ଭୁଲିବା ନାହିଁ
ମିତ୍ରଦ୍ରୋହୀ ଗତି ନରକକୁ ହୁଏ-
ଗୀତଟିଏ ମିତ ପାଇଁ ।
-ବିଶ୍ୱେଶ୍ୱର ମାଝୀ-
M: 9437697161
majhibisweswar@gmail.com
