ଈଶ୍ବର କେଉଁଠି
ଈଶ୍ବର କେଉଁଠି
ଈଶ୍ଵରଙ୍କୁ ଖୋଜି ବୁଲୁ ଆମେ ମନ୍ଦିରର ପାଷାଣ ମୂର୍ତ୍ତିରେ
ପାଷାଣର ପ୍ରାଣ ଅଛି ଯଦି ଡେଇଁଥାନ୍ତ କି ସିଂହ ଦୁଆରେ !
ପାଷାଣ ମୂର୍ତ୍ତି ଆଗରେ ନିର୍ଭୟରେ ହୁଏ ବ୍ୟଭିଚାର
ପାଷାଣର ପ୍ରାଣ ଥିଲେ ପାପୀ ପ୍ରାଣ ଧରି ଥାନ୍ତା ସ୍ୱଦେହର !
ଈଶ୍ଵର ମନ୍ଦିରେ ବସିଲେ ଚାଲନ୍ତା କି ସଂସାର ଆଗକୁ
ଦେବାଦେବୀ ତେତିଶ କୋଟିର କିଏ ଅବା ରଖିବ କାହାକୁ !
ଦ୍ଵାଦଶ ଆଦିତ୍ୟ ଏକାଦଶ ରୁଦ୍ର ଅଷ୍ଟ ବସୁ ପୁଣି
ଅଶ୍ଵିନୀ କୁମାର ମିଶି ତେତିଶ ପ୍ରକାର ଦେବତାଟି ଗଣି ।
ଗୀତାର ମହତ ବାଣୀ ଅଖଣ୍ଡ ମଣ୍ଡଳାକାର ଏହି ସୃଷ୍ଟି
କୋଟି କୋଟି ତାରା ସୂର୍ଯ୍ୟ ଯହିଁ ମହାଶୂନ୍ୟେ ଭାସି ବୁଲୁଥାନ୍ତି ।
ଆରମ୍ଭ କେଉଁଠୁ ଶେଷ କେଉଁ ଠାରେ ସର୍ବେ ଅଗୋଚର
ଝୁଲୁଛି ପୃଥିବୀ ଆମ ପର୍ବତ ବନାନୀ ଧରି ନଦୀ ଓ ସାଗର ।
ଅଣୁଠାରୁ ସାନ ଯା’ ଶରୀର ସବୁ ଠାରୁ ବଡ କର ଗଣ୍ୟ
ଈଶ୍ଵରଙ୍କ ଶରୀର ବର୍ଣ୍ଣନା ଶୂନ୍ୟ ଶୂନ୍ୟ ଅଟେ ମହାଶୂନ୍ୟ ।
ଇତିହାସ କେତେ ହଜିଯାଏ କାଳ ବକ୍ଷେ ବର୍ଷ ମାସ କି ବା’
ଅନନ୍ତ ମାହାଳକୁ ଈଶ୍ଵରଙ୍କ ଆୟୁଷ ହେଜିବା ।
ଅନନ୍ତ ପ୍ରକୃତି ବକ୍ଷେ ଜନ୍ମ ଆମ ଲୀନ ହେବା ତହିଁ
ତୃଣ ତରୁ ଶସ୍ୟ ଫୁଲ ଫଳ କୁଳୁ ନାଦେ ନଦୀ ଯାଏ ବହି ।
ଖାଦ୍ୟ ଖାଦକ ଉଭୟ ନିର୍ଭୟରେ ହୁଏ ଚଳାଚଳ
ନଜାଣଇ କେହି ବି କାହାର ପୁରିଯିବ କେବେ ଅବା କାଳ !
ଅଢେଇ ଦିନକୁ ମନ କରେ କେତେ ବଢେଇ ବାଡେଇ
ମାନବ ସେବାରେ ମାଧବ ପ୍ରାପ୍ତି ଦିଏ ଏକଥା ଭୁଲେଇ ।
-ବିଶ୍ଵେଶ୍ୱର ମାଝୀ-