ବର୍ଷା

ବର୍ଷା କଦମ୍ବ ବୃକ୍ଷ ମୂଳେ

ମୋ ଦେହକୁ ଛୁଇଁଛି

ସୁଖ ବି ପାଇଛି |

ସେ ବା କାହାକୁ ଛାଡ଼ିଛି

ନଈ କୂଳରେ

ଗଛ ଡାଳରେ

ତମାମ ବର୍ଷିଛି

ଘର ଉପର ଟିଣ ଛାତକୁ

ତାବଲା କରି ଧୁମ୍ ଛେଚିଛି

ବର୍ଷା କିନ୍ତୁ ମୋତେ ତଲ୍ଲୀନ କରିଛି |

କେଉଁଠି ନାଚିଛି ତ

କେଉଁଠି ଗାଇଛି

ତୃଷ୍ଣା ମେଣ୍ଟାଇଛି କାହାର

କାହାର ବଢ଼ାଇଛି

କାହାକୁ ବିରହରେ ଜାଳିଛି

କାହାକୁ ତିନ୍ତାଇଛି,

ସମସ୍ତଙ୍କୁ ଛୁଇଁଛି

ଛୁଇଁ ଛୁଇଁ ଏ ଧରାରେ

ଟୋପା ଟୋପା ଅମୃତ ସିଂଚିଛି |

ମୁ ଆଜି ନୀରବରେ ଦେଖୁଛି

ବିଜୁଳି ଚାବୁକରେ ବର୍ଷା କେମିତି

ମେଘରୁ ବର୍ଷୁଛି

ଫୁଲରୁ ଝରୁଛି

ପଦ୍ମ ପତ୍ରରେ ପାରଦ ପରି

ଏ ପତ୍ର ରୁ ସେ ପତ୍ରକୁ ଢଳୁଛି |

ପବନ ଝୁଲଣରେ ଝୁଲି ଝୁଲି

ମୋତି ପରି

ଜହ୍ନ ଆଲୁଅରେ ଝଲକୁଛି |

ମନର ଝର୍କାରେ ଦେଖୁଛି

ଝିଲ୍ ମିଲ୍ ପାଣି

କେମିତି ଶ୍ରାବଣ ରାତିରେ

ତା' ଅଖିରେ ଆଣୁଛି

ଅଜସ୍ର କାହାଣୀ |

ବର୍ଷାର ଟୋପା ଟୋପା ପାଣି

ଦୋହଲି ଦୋହଲି ନାଚୁଛନ୍ତି

ଆକାଶରୁ ଗଳି,

ରୂପାର ବର୍ଷା ହେଉ କି ସୁନାର ବର୍ଷା

କେବେ ମୃଦୁ

କେବେ କଠିନ ତା’ ଭାଷା

ଜୀବନର ଆଶା

ଆଉ ଜୀବନ ଭରଷା,

ଆକାଶରୁ ଝରୁଛି

ସେ ମନ୍ଦାକିନୀ

ଧରଣୀରେ ହୋଇ କଲ୍ଲୋଳିନୀ |

********