ଅଜାଙ୍କ ପ୍ରେରଣା
ଅଜାଙ୍କ ପ୍ରେରଣା
ସ୍କୁଲ ଛୁଟି ହେଲା ନାତୁଣୀ ଆସିଲା
ଫୁଲେଇ ଅଛି ଯେ ମୁହଁ
ଘଟଣା ନିଶ୍ଚୟ କିଛିତ ହୋଇଛି
ନାତୁଣୀ ମୋ କଣ କୁହ ?
ଅଜା କଥା ଶୁଣି କହୁଛି ନାତୁଣୀ
ଶିକ୍ଷକ ଯେ ଦେଲେ ଗାଳି
ପଚାରିଲେ ପ୍ରଶ୍ନ ନ ପାଇଁ ଉତ୍ତର
ମୋ ଉପରେ ରାଗ ଖାଲି l
ପଢ଼ାନ୍ତି ଶିକ୍ଷକ ବୁଝି ମୁଁ ପାରେନି
ମୋର କିମ୍ବା ଅଛି ଦୋଷ
ପରିଶ୍ରମ କରେ ଉତ୍ତର ଦେବାକୁ
ଆଉ କରିପାରେ କିସ ?
ଶୁଣି ଅଜା କହି ଏଇ କଥା ପାଇଁ
ନାତୁଣୀ କିମ୍ବା ଯେ ରାଗ
ମନ ଦେଇ ଶୁଣେ ମୋ ସୁନା ନାତୁଣୀ
କହୁଛି ଯେ କଥା ଆଗ l
ଛୋଟପିଲା ଟିଏ ଚାଲିବାକୁ ଶିଖେ
ପଡିଥାଏ ବାରମ୍ବାର
ତଥାପି ଅଭ୍ୟାସ ଜାରି ରଖିଥାଏ
କେବେ ନ ଛାଡେ ତାହାର l
ଚାଲିବା ସମୟେ ବାପାମାଆ ଅଜା
ଆଦିର ସାହାଯ୍ୟ ନିଏ
ଶିଖିଗଲା ପର ନିଜେହିଁ ନିଜେହିଁ
ସବୁ କାମ କରିଥାଏ l
ସେହିପରି ପାଠ ପଢ଼ିବା ସକାଶେ
ମନୋବଳ ଦୃଢ଼ କଲେ
ପରିଶ୍ରମ କଲେ ସକଳ ସମ୍ଭବ
ହୋଇଯାଏ ଅବହେଲେ l
ବିଦ୍ୟାଳୟେ ପାଠ ପଢ଼ିବା ସମୟେ
ମନଧ୍ୟାନ ଦେଇ ଶୁଣ
ପଢୁଥିଲା ବେଳେ ସନ୍ଦେହ ହୋଇଲେ
ପଚାରିବ ପୁଣ ପୁଣ l
ଜାଣିବା ଅଭ୍ୟାସ ଯାହାର ରୁହଇ
ସବୁଠି ହୁଏ ସଫଳ
ସଫଳତା ପାଇଁ ଆଗେ ଦରକାର
ନିଜର ଯେ ମନୋବଳ l
କାହିଁପାଇଁ ପାଠ ବୁଝି ହେଉନାହିଁ
ନିଜେ କର ଅନ୍ୱେଷଣ
ନିଜ ଭୁଲ ଯଦି ଥରେ ଜାଣିଗଲ
ସବୁ ହେବ ସମାଧାନ l
ଶିକ୍ଷକ ଆମକୁ ଦିଅନ୍ତି ନି ଗାଳି
କୁହନ୍ତି ମଙ୍ଗଳ ପାଇଁ
ସଚେତନ ହେଲେ ଛାତ୍ରଛାତ୍ରୀ ମାନେ
କରନ୍ତି ପ୍ରଶଂସା ସେହି l
ପାଠକୁ ନ ଡରି ଶିକ୍ଷକ ପଚାରି
ଯଦି କାମକରେ ଛାତ୍ର
ନିଶ୍ଚୟ ସଫଳ ଜୀବନେ ହୁଅଇ
ଏହା ସଫଳତା ସୂତ୍ର l
ଆତ୍ମ ବିଶ୍ୱାସଟି ନିଜର ଉପରେ
ପ୍ରଥମେ ଯେ ଦରକାର
ମୋ ସୁନା ନାତୁଣୀ ସେହି କଥାଭାବି
ଛାଡିଦେ ରାଗ ତୋହର l
ଏହା ଶୁଣି ହସି ନାତୁଣୀ କହୁଛି
ସତ ଯେ କହିଲେ ଅଜା
ଆଜିଠାରୁ ମନ ଦେଇଣ ପଢ଼ିବି
ପାଠପଢ଼ା ନୁହେଁ ସଜ୍ଜା l
ଯାହା ନ ଜାଣିବି ପଚାରିବୁଝିବି
ନ କରିଣ ତିଳେ ଭୟ
ଶିକ୍ଷକ ଙ୍କ କଥା ମାନିଚଲୁଥିବି
ନ ହେବି କେବେ ଅଥୟ l
ଶିକ୍ଷକ ଙ୍କ ପାଠ ଅଜାଙ୍କ ପ୍ରେରଣା
ସର୍ବଦା ମନେ ରଖିବି
ଭଲ ପାଠପଢ଼ି ନିଶ୍ଚୟ ଦିନେ ମୁଁ
ଆପଣା ନାମ ରଖିବି l