Library
କିଏ କହେ ତମକୁ ମୁଁ ଭଲ ପାଏନା
କିଏ କହେ ତମକୁ ମୁଁ ଭଲ ପାଏନା
ଆବିଷ୍କାର କଲି ଯେବେ
ତୁମକୁ ମର୍ତ୍ତ୍ଯରେ,
ସେବେଠୁ ପାଉଛି ଭଲ
ଭୁଲି ନାହିଁ ଥରେ ।
ମୋତେ ଭାରି ଭଲ ଲାଗେ
ଯାହା କହୁଥାଅ,
ସେଇ ବାଟେ ଯାଏ
ଯେଉଁ ବାଟେ ତୁମେ ଯାଅ ।
ପଛକୁ ଫେରିଲେ ସିନା
ଜାଣିବ ନବୀନା •••
କିଏ କହେ ତମକୁ ମୁଁ ଭଲପାଏନା ?
ପାହାନ୍ତିଆ ସ୍ବପ୍ନ ମୋତେ
ଶହେ ସୁଖ ଦିଏ,
ତୁମେ ଆସୁଥାଅ ବୋଲି
ଶୋଇ ଦେଖୁଥାଏ ।
ଅନ୍ଯ କାହା ଡାକ ଜମା
ନ ଶୁଭଇ ମୋଟେ,
ତୁମେ ଯେବେ ଉଠ କୁହ
ପ୍ରାଣ ଚେଇଁ ଉଠେ ।
ଦରଦୀ ମନରେ ମୋର
ଭରୁଛ ଭାବନା •••
କିଏ କହେ ତମକୁ ମୁଁ ଭଲପାଏନା ?
ତୁମ ସ୍ପର୍ଶ ପାଇବାକୁ
ବ୍ଯାକୁଳ ହୃଦୟ,
ଆରଗନ୍ ଗ୍ଯାସ୍ ଭଳି
ରହିଛି ନିଷ୍କ୍ରିୟ ।
କୁଣ୍ଡରୁ ପଡେ ଉଚ୍ଛୁଳି
ପ୍ରୀତି ମିଶା ସ୍ନେହ,
ମନୁଷ୍ୟ ଜନ୍ମରୁ ପ୍ରିୟା
ମୋତେ ମୁକ୍ତି ଦିଅ ।
କୃଷ୍ଣା ତୁମେ ମୋ ପ୍ରାଣରୁ
ମେଣ୍ଟାଉଛ ତୃଷ୍ଣା •••
କିଏ କହେ ତମକୁ ମୁଁ ଭଲପାଏନା ?
ଶାନ୍ତି ନିକେତନ ତୁମେ
ଏ ଯାଯାବରର,
କୋଟି ଜନ୍ମେ ନ ଭୁଲିବି
ତୁମ ଦେଶ ଦ୍ବାର ।
ବେଦ-ଶାସ୍ତ୍ର-ରାମାୟଣ
ମହାଭାରତରେ,
ନପାଏ ଅଥଚ ଖୋଜେ
ପ୍ରତିଟି ଶବ୍ଦରେ ।
କାଳେ ପାଇଯିବି ବୋଲି
ଖୋଜୁଅଛି ସିନା •••
କିଏ କହେ ତମକୁ ମୁଁ ଭଲପାଏନା ?
ମୋ ଚାଟଶାଳିର ତୁମେ
ବର୍ଣ୍ଣବୋଧ ପାଠ,
ପଣକିଆ ମାଳା - ଗପ
ମିଠା ମିଠା ଗୀତ ।
ଜୀବନ୍ତ କଥା ସଂଗୀତ
କବିତା ପେଡିର,
ବିଶ୍ବରୂପ ମୟୀ ତୁମେ
ଶ୍ରୀ ରାଧା ଗୋ ମୋର ।
ମନ କେନ୍ଦୁଝର, ଦେହ
ଦେବଗଡ ସିନା •••
କିଏ କହେ ତମକୁ ମୁଁ ଭଲପାଏନା ?
ମନ ଦିଆ ନିଆ ନୁହେଁ
ଟିକିଏ ବି ପାପ,
କାମନା ମଦିରା ପେଇ
ହର ଗୋ ସନ୍ତାପ ।
ମିଳନର ସ୍ବର୍ଗ ସୁଖ
ମାଗେ ମୋର ହିୟା,
ନିରବରେ ଓଠ ଡାକେ
ପ୍ରିୟା,ପ୍ରିୟା ,ପ୍ରିୟା।
ନିବେଦନ ମୋର କେବେ
ଶୁଣୁ ନାହଁ ଜମା
କିଏ କହେ ତମକୁ ମୁଁ ଭଲପାଏନା ?
ତୁମ ଚିହ୍ନ ଲୁଚେଇଛି
ଭଙ୍ଗା ହୃଦୟରେ,
ତଥାପି ପାଉଛି ଭଲ
ଗାଳି କଲା ପରେ ।
ମୋ ପ୍ରାଣର କୃଷ୍ଣଚୂଡା
ଶେଫାଳି ଗୋ ତୁମେ,
ଶିଳା-ତାଳ ପତ୍ରେ କାବ୍ୟ
ଲେଖେ ତୁମ ନାମେ ।
ତୁମେ ମୋ ବାଡିର ଆମ୍ବ
ପିଜୁଳି-ସଜନା •••
କିଏ କହେ ତମକୁ ମୁଁ ଭଲପାଏନା ?
ଭାରତ ଭାରତୀ ତୁମେ
ରାଜ୍ୟ ରାଜଜେମା,
ଊଣା ହୋଇବ ତୁମକୁ
ସମସ୍ତ ଉପମା ।
ପୁନର୍ବଷୁ କର୍କଟ ଗୋ
ତୁମ ରାଶିଫଳ,
ତୁମ ପରି ନାରୀ ପରା
ମର୍ତ୍ତ୍ଯରେ ବିରଳ ।
ସାହିତ୍ୟ ସୃଷ୍ଟିରେ ତୁମେ
ଅମ୍ଳାନ ବର୍ଣ୍ଣନା •••
କିଏ କହେ ତମକୁ ମୁଁ ଭଲପାଏନା ?
କବି କୁଟୀର
ଶ୍ରୀ ଲକ୍ଷ୍ମଣ କୁମାର ବେହେରା (ଯତି)
ଦଣ୍ଡାସିଂହା,ବାରକୋଟ
ଦେବଗଡ (ଓଡିଶା)
ମୋ-09668242720
