ମେଘ ସବାରୀରେ ବରଷା ଆସୁଛି
ମେଘ ସବାରୀରେ ବରଷା ଆସୁଛି
ମେଘ ସବାରୀରେ ବରଷା ଆସୁଛି
ମଖମଲି ପାଟ ପିନ୍ଧି ,
ମଥାରେ ସିନ୍ଦୁର ନୟନେ କଜ୍ଜଳ
ପାଦରେ ନୁପୂର ବାନ୍ଧି ।।
ଗଳାରେ ଲମ୍ବିଛି ସ୍ଵଚ୍ଛ ମୁକ୍ତା ହାର
ଗଭାରେ ରଜନୀଗଂଧା ,
ହାତରେ ପିନ୍ଧିଛି ସୁବର୍ଣ୍ଣ ର ଚୁଡି
ହୃଦୟ ଅଳକାନନ୍ଦା ।।
ବିଜୁଳି ଚମକ ଘଡଘଡି ଡାକ
ପୂର୍ଣ୍ଣଗର୍ଭା ନଦୀ ବିଲ ,
ନୀଳାଭ ଆକାଶେ ଜଳୁଛି ଦୀପାଳି
ରୋଷଣୀରେ ଝଲମଲ ।।
ମୌସୁମୀ ପରଶେ ପ୍ରୀତି ଗୁଂଜରିତ
ପ୍ରେମସିକ୍ତା ତନୁ ମନ,
କଦମ୍ବ ପତ୍ର ରେ ରୂପର ଲାବଣ୍ୟ
ଢଳଢଳ ଚିତ୍ତ ପ୍ରାଣ ।।
ବରଷା ରାଣୀ ର ବାଙ୍କ ଚାହାଣୀରେ
କୃଷ୍ଣଚୂଡାର ରଂଗ ,
ଇନ୍ଦ୍ରଧନୁ ର ସାତ ରଂଗନେଇ
ସଜାଇଛି ନିଜ ଅଙ୍ଗ ।।
ତପତ ତପନ ତାପିତ ଏ ଧରା
ଲଭିବ ସରଗ ଶୀରି ,
ପଲ୍ଲବିତ ହେବ ପାଦପ ପତର
ସବୁଜ ସୁଷମା ଧରି ।।
ହସିବ ଧରଣୀ ହସିବ ଆକାଶ
ଚନ୍ଦନ ପଡିବ ଝରି ,
ମେଘମାଳା କେତେ ଓହ୍ଲାଇ ଆସିବେ
ଝରିବ ପ୍ରେମ ନିର୍ଝରୀ ।।
ଚନ୍ଦନ ଚର୍ଚ୍ଚିତା ପୁଷ୍ପ ବିମଣ୍ଡିତା
ସରଗ ରାଇଜ ପରୀ ,
ଧୀରେ ପାଦ ଥାପି ମରତ ମଣ୍ଡଳେ
ବାଣ୍ଟିଦେବ ସୁଖଶୀରି ।।
ଅମୃତ ସିଂଚିବ ଜୀବନ ବଂଚିବ
ନାଚିବ ମନ ମୟୂର ,
ମଧୁମୟ ହେବ ଏ ସାରା ସଂସାର
ଜଗତ ହେବ ବିଭୋର ।।
ମାଟିରୁ ଆକାଶ,ଆକାଶରୁ ମାଟି
ଚହଟିବ କେତେ ବାସ ,
ମେଘ ସବାରୀରେ ବରଷା ଆସୁଛି
ସାଜି ନବବଧୂ ବେଶ ।।
--------'---------------------------
ଅଧ୍ୟାପକ ଶରତ କୁମାର ଦାସ
ବଡବିଲ ମହାବିଦ୍ୟାଳୟ,ବଡବିଲ,କେନ୍ଦୁଝର।
ଦୁରଭାଷ-9438243149