ଭାଲୃଣ୍ଟାଇନ ଦିନ ଉପଲକ୍ଷେ

ମଳୟ ବୋହିନି ମଧୁପ ଆସିନି

ଆସିନାହିଁ ମଧୁକାଳ

ମଧୁକର କିନ୍ତୁ ମଧୁ ନେବା ଆଶେ

ଖୋଜୁଥାନ୍ତି ମଧୁବେଳ

ସପ୍ତା ସମାରୋହ ଭାଲେଣ୍ଟାଇନର

ସାତ ଦିନେ ସମାପନ

ରୋଜ ଦିନ ଠାରୁ ହଗ୍ ଦିନ ଯାଏ

ଯୁବା ମନ ଛନ ଛନ

ପାଗ ଅନୁକୂଳ ପଶ୍ଚିମ ସକଳ

ଏହି ମାସେ ତେଣୁ ବନ୍ଧା

ପୁରୁବେ ପରବ ନୁହେଁ ପରାଗତ

ପରାନୁକରଣେ ଫନ୍ଦା

ବସନ୍ତରେ ବଶ ରାଧାକୃଷ୍ଣ ରାସ

ଭକ୍ତି ପ୍ରେମ କର୍ମ ସୁଖ

ପ୍ରେମର ପୁଲକ ପାଆନ୍ତି ଉତ୍ସୁକ

ତୃଷାର୍ତ୍ତ କୁ ବଳାହକ

କୃଷ୍ଣ ପ୍ରେମ ଭାବ ବୁଝୁଛି ବା କିଏ

ମଦମତ୍ତେ ଚର୍ମାନନ୍ଦ

ଅନ୍ଧ ହୋଇଯାଏ ବିବେକ ବିଚରା

ସତେକି ପରମାନନ୍ଦ।

ଭାଲୃଣ୍ଟାଇନ ଯେ କରିଥିଲେ ଯାହା

କରୁଛି ବା କିଏ ତାକୁ

ପ୍ରତୀକ ଧର୍ମରେ ପ୍ରେମ ପରିଭାଷା

ପାଶ୍ଚାତ୍ୟ କରିଛି କାବୁ

ପ୍ରପୋଜ ଡେ ପରେ ବ୍ରେକ୍ ଅପ୍ ଆସେ

ପ୍ରେମ ପର୍ବେ ଏକ ଧାରା

ଯୁବକ ଯୁବତୀ ବେଳହୁଁ ବିଳାସୀ

ଦେଉଛନ୍ତି ଯାହା ନାରା

ପ୍ରଶାନ୍ତ କୁମାର ହୋତା