ଚିରଦିନ ଚତୁରଙ୍ଗ ସଙ୍ଘର୍ଷ
ଚିରଦିନ ଚତୁରଙ୍ଗ ସଙ୍ଘର୍ଷ
ଏହି ଜୀବନ୍ତ ଜୀବନ ସ୍ୱୟଂ ହେଉଛି ଚିରଦିନ ଚତୁରଙ୍ଗ ସଙ୍ଘର୍ଷ,
ଏହି ନିରନ୍ତର ପ୍ରକ୍ରିୟା ର ଚଳନ ରହିବ ବର୍ଷ ପରେ ବର୍ଷ ।
ଜୀବନ ଯେ ସତରଞ୍ଜ ଖେଳର ଚିତ୍ରିତ ପଟି,
ସମସ୍ତ ଜନ ହେଲେ ସତରଞ୍ଜ ଖେଳର ବିଭିନ୍ନ ଗୋଟି ।
ଏଥିରେ ଅଛନ୍ତି କେତେ ଭାବପୂର୍ଣ୍ଣ ବିଶେଷ ବନ୍ଧନ,
ଆଗେଇ ନେଇ ଯାଆନ୍ତି ଜୀବନ କୁ ହୋଇ ଇହଲୋକ ଇନ୍ଧନ ।
ପରିଚିତ ହେବେ କେତେ ଯେ ପାତ୍ର ପାତ୍ରୀ,
ଜଣା ଅଜଣାଙ୍କ ଠାରୁ ମିଳିବ ଯେ ଶତ୍ରୁତା ମୈତ୍ରୀ ।
ନିତିଦିନ ଅତିବାହିତ ହେବ ଯେମିତି ଏକ ନିତ୍ୟନୂତନ ଚତୁରଙ୍ଗ,
ଅନନ୍ୟ ଅନୁବନ୍ଧ ଅନୁଭୂତି ଅଭିଜ୍ଞତା ଅର୍ଜନ କରାଏ ଏହି ଉତ୍କଣ୍ଠିତ ରୋମାଞ୍ଚିତ ରଣରଙ୍ଗ ।
ସଦା ପ୍ରସ୍ତୁତ ସଚେତ ସତର୍କ ରହିବାକୁ ଜଣାଏ ସମର ପ୍ରାଙ୍ଗଣ,
କିଏ ବି ଜାଣିନି କେବେ କାହାଠାରୁ ଦେଖିବାକୁ ପଡ଼ିବ ଅବବୋଧହୀନ ଆକ୍ରମଣ ।
ପିତାମ୍ବର ପାର୍ଥସାରଥୀ ପାର୍ଥଙ୍କୁ ବୋଧ କରିଲେ ଚତୁରଙ୍ଗ ସୈନ୍ୟବାହିନୀ ର ମହତ୍ୱ,
କର୍ତ୍ତବ୍ୟପରାୟଣ କର୍ତ୍ତବ୍ୟଜ୍ଞାନ କର୍ମଯୋଗ ମାର୍ଗ ରେ ଭୁଲିବାକୁ ହେବ ସମ୍ବନ୍ଧୀୟଙ୍କ ପ୍ରତି ମମତ୍ୱ ।
ଅସୀମ ସଂସାର ସମ ସତରଞ୍ଜ ରେ ଆସିଛନ୍ତି ସମସ୍ତେ ଏକା,
ପ୍ରତି ପ୍ରତିଦ୍ୱନ୍ଦ୍ୱିତା ପ୍ରତିଯୋଗିତା କୁ ଅତିକ୍ରମ କରିବାକୁ ପଡ଼ିବ ହୋଇ ଏକା ।
ବେଗ ଅଶ୍ୱ ପରି ରସନା କୁ ରଖିବାକୁ ହେବ ବଶୀଭୂତ,
ସମୟାନୁବର୍ତ୍ତୀ ସମୟାନୁସାର ନିର୍ବାକ ରହି ନିଜ ଲକ୍ଷ୍ୟ ପ୍ରତି ଧ୍ୟାନ ରହୁ କେନ୍ଦ୍ରିତ ।
ପଦାତି ହୋଇ ଲଙ୍ଘିବାକୁ ହେବ ଜୀବନପଥ,
ମହାରଥୀ ହୋଇ ସୁଚାରୁରୂପେ ଆଗେଇ ନେବାକୁ ହେବ ଜୀବନରଥ ।
ହସ୍ତୀଙ୍କ ସହର ହସ୍ତିନାପୁର ଥିଲା ଚନ୍ଦ୍ରବଂଶୀୟଙ୍କ ରାଜଧାନୀ ନଗରୀ,
ହସ୍ତୀ ନାମକ ନରପତିଙ୍କ ଦ୍ୱାରା ନିର୍ମିତ ହେଲା ଏହି ପ୍ରାଚୀନ ନଗରୀ ।
ସର୍ବଦା ସାହା ହୋଇ ରହିବେ ନିଜ ମାତା,
ଶ୍ରୀଜଗନ୍ନାଥ ଯାବଜ୍ଜୀବନ ରହିବେ ଆମ ଧୈର୍ଯ୍ୟ ପ୍ରଦାତା ।
ସଦା ନେବାକୁ ହେବ ଜ୍ଞାନୀ ବିଜ୍ଞାନୀ ବିଦ୍ୱାନଙ୍କ ପରାମର୍ଶ,
ଉତ୍ତମ ଅନୁକୂଳ ପରିଣାମ ସୁନିଶ୍ଚିତ ମିଳିବ ଯଦି ହେବ ତାଙ୍କ ସହ ବିଚାର ବିମର୍ଶ ।
ଆଜୀବନ ଗତିରୋଧ ପ୍ରତିରୋଧ କରିବେ ଭିନ୍ନ ବିଭିନ୍ନ ବିଭ୍ରାଟ,
ଚିରଦିନ ଚତୁରଙ୍ଗ ସଙ୍ଘର୍ଷ କୁ ବିଜୟ କରିଲେ ହୋଇ ପାରିବ ସ୍ୱପ୍ନ-ସାମ୍ରାଜ୍ୟ ର ସମ୍ରାଟ ।