ଆମେ ଅଗଷ୍ଟ ପନ୍ଦର ପାଳୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ
ଅଗଷ୍ଟ ପନ୍ଦର ପାଳୁଛୁ
ଜନଗଣ ମନ ଗାଉଛୁ
ତ୍ରିରଙ୍ଗା ଉଡେଇ ଝୁଡ଼ିବୁନ୍ଦି ଖାଇ
ଜୟହିନ୍ଦ ବୋଲି କହୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।
ସଂଗ୍ରାମୀଙ୍କୁ ମନେ ରଖିଛୁ
ପ୍ରତିମୂର୍ତ୍ତି ତାଙ୍କ ଦେଖିଛୁ
ସ୍ୱାଧୀନତା ଦିବସ ଆସିଯାଏ ଯେବେ
ତାଙ୍କୁ ଧୁଆ ଧୁଇ କରୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।
ପାଦ ତଳୁ ଘାସ ବାଛୁଛୁ
ଭାଙ୍ଗିଥିଲେ ତାକୁ ନେସୁଛୁ
ପୁରୁଣା ଦେହେରେ ନୂଆ କରି ପୁଣି
ଆଉ ଥରେ ରଙ୍ଗ ବୋଲୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।
ଫୁଲରେ ସଜେଇ ଦେଉଛୁ
ବଡ଼ ବଡ଼ ମାଳ କିଣୁଛି
ଟେକି ନପାରିଲେ ଅଙ୍କୁରି ଲଗେଇ
ବେକରେ ଗଳେଇ ଦେଉଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।
ଭାଷଣ ମେଞ୍ଚାଏ ଦେଉଛୁ
ତାଙ୍କରି ଗୁଣକୁ ଗାଉଛୁ
ଏହିଦିନ ଆସି ଚାଲି ଗଲାପରେ
ସେଇଠି ଗଞ୍ଜେଇ ପିଉଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।
ସରକାରୀ ଛୁଟି ପାଉଛୁ
ତ୍ରିରଙ୍ଗା ଉଡେଇ ଦେଉଛି
କାମ ସରିଗଲେ ସେହି ତ୍ରିରଙ୍ଗାକୁ
ରାସ୍ତାରେ ବିଛେଇ ଦେଉଛି
ଆମେ ଅଗଷ୍ଟ ପନ୍ଦର ପାଳୁଛୁ ।
ଆମେ ଯେ ସ୍ୱାଧୀନ ହୋଇଛୁ
ସ୍ୱାଧୀନ ଭାବରେ ଜିଉଁଛୁ
ସ୍ୱାଧୀନତା ନାମେ ନିଜର ସ୍ୱାର୍ଥରେ
ନିଜେ ବଳିୟାନ ରହୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।
ସ୍ୱାଧୀନ ସନ୍ତାନ ହୋଇଛୁ
ନିଜ ଅଧିକାର ପାଇଛୁ
ଛୁରୀ ବନ୍ଧୁକରେ ଖେଳ ଖେଳି ଆମେ
ଅହିଂସା ବୋଲିକି କହୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।
ଗାନ୍ଧିଜୀଙ୍କୁ ମନେ ରଖିଛୁ
ବର୍ଷରେ ଥରୁଟେ ଦେଖୁଛୁ
ଅଗଷ୍ଟ ପନ୍ଦର ଆସିବା ଆଗରୁ
ଖୋଜି ଖାଜି ତାଙ୍କୁ ରଖୁଛୁ
ଆମେ ଅଗଷ୍ଟ ପନ୍ଦର ପାଳୁଛୁ ।