ଚାକିରୀ ଜୀବନ
ଚାକିରୀ ଜୀବନ
ପେଟ ଚାଖଣ୍ଡ ପାଇଁ ଓଡ଼ିଶାରେ ଚାକିରୀ କାହିଁ ?
ଛାଡିଲି ଘର ବୁଲିଲି ସହର ନଗର ଡ଼େଇଁ ।
ଗଲି ଝାଡ଼ଖଣ୍ଡ ରାମଗଡ ବରକାକାନାର କୋଇଲାଖଣି
ଡି.ଏ.ଭି.ରେ ମାଷ୍ଟର ହେଲି ଆଣିଲି ପଇସା ଛାଣି ।
କାହିଁ ଆସାମ ଶିବସାଗର ମେକିପୁରର ଚା’ ବଗିଚା
କାହିଁ ରାଜସ୍ଥାନ ଜୈସାଲମିରର ବାଲି ବାର୍ଚ୍ଛନର ତମାସା ।
କାହିଁ ଆନନ୍ତନାଗର ହାଡଥରା ବରଫ ଶୀତ
କାହିଁ ଏରନାକୁଲମର ରିମଝିମ ବରଷା ଗୀତ ।
କାହିଁ ୟାନମ ପୁଡୁଚେରୀର ଗୌତମୀ ନଦୀକୂଳ
କାହିଁ ଢେଙ୍କାନାଳର ସରାଙ୍ଗ ପାହାଡ ମୂଳ ।
ଶିଖିଲି କହିଲି ଲେଖିଲି ଓଲଟା ପୁଲଟା ହିନ୍ଦୀ
କିଣିଲି ରଙ୍ଗ ବେରଙ୍ଗର ରାଜସ୍ଥାନୀ ବିନ୍ଦି ।
କହିଲି ତେଲୁଗୁ କୁଞ୍ଚମ କୁଞ୍ଚମ
ରଖିଲି ଆସାମିଆ ଗାମୁଛା-ସରାଇ-ଯାପିର ଆଲବମ ।
ଖାଇଲି ଦୋଷା ଇଡ୍ଡଲି ଚଟଣି ହର୍ଦମ
ରୋଟି ଛୋଲା ଭଟୋରା ସଂଭର ରସମ ।
ମାତ୍ର ! କାହିଁକି କେଜାଣି ?
ଛୁଟିରେ ଆସିଲେ ଘର ଗାଁ ଦାଣ୍ଡର ନଜର
ମନ ଆପେ ଆପେ ପୁଲକିତ ଖୁସିର ମୋହର ।
ମା’ ହାତ ଶାଗ ଖରଡା ପିତା ଗୀମା-ପୋଡାର ସୁଆଦ
ବଳେଇ ବଳେଇ ଖୁଆଇ ଦେବାର ମିଠା ନୈସର୍ଗିକ ଆନନ୍ଦ ।
ପୋଖରୀ ପହଁରା ଗାଧୁଆ ସାଙ୍ଗ ପୁରିଆ ନରୁଆ
ହସି ହସି କଥା ସବୁ ପଚାରନ୍ତି ଅବାଗିଆ ଅଖାଡୁଆ ।
ଆପଣେଇ ନେବାରେ ନଥାଏ କୃତିମତାର ତମାସା
ସରାଗରେ ସବୁ ଦେବାରେ ଥାଏ ସ୍ଵର୍ଗୀୟ ପରିଭାଷା ।
କାହିଁକି କେଜାଣି ? କାହିଁକି କେଜାଣି ?