ସବୁ ଥାଉ
ସବୁ ଥାଉ
ରାତି ଥାଉ
ରାତିର ଅନ୍ଧାର ଥାଉ
ଅନ୍ଧାରରେ ସାରା ଆକାଶ
ତାରାମେଳେ ଚିକ ଚିକ କରୁଥାଉ
ବିଜନ ଘନ ରାତି
ମୋର ସାଥି ଥାଉ |
ଜହ୍ନ ଥାଉ
ଜହ୍ନ ଜ୍ୟୋତ୍ସ୍ନା ଢ଼ାଳୁ ଥାଉ
ଜ୍ୟୋତ୍ସ୍ନା ବିଧୌତ ରଜନୀ
ତୁମସାଥେ ଆଲୋକିତ ହେଉ
ପ୍ରେମ ସାଥି ଜହ୍ନ
ମୋର ସାକ୍ଷୀ ଥାଉ |
ସ୍ଵପ୍ନ ଥାଉ
ସ୍ୱପ୍ନରେ ରଙ୍ଗ ଥାଉ
ରଙ୍ଗରେ ରଙ୍ଗମୟ ମନ
ନୀଳ ଆକାଶରେ ଉଡୁଥାଉ
ପ୍ରୀତିଭରା ସ୍ଵପ୍ନ
ମୋର ଲକ୍ଷ ଥାଉ |
ଫୁଲ ଥାଉ
ଫୁଲର ମହକ ଥାଉ
ମହକ ବିତରି ଫୁଲ
ତୁମ କବରୀରେ ଖୋସା ଥାଉ
ପ୍ରସ୍ଫୁଟିତ ଫୁଲ
ମୋର ଲୋଡ଼ା ଥାଉ |
ହସ ଥାଉ
ହସରେ ଲଜ୍ଜା ଥାଉ
ଲଜ୍ଜାନତ ମୁଖ ମଣ୍ଡଳରୁ
ଲାବଣ୍ୟର ମହୁ ଝରୁ ଥାଉ
ଫିକ ଫିକ ହସ
ମୋର ହୃଦେ ଥାଉ |
ରାତି ଥାଉ
ଜହ୍ନ ଥାଉ
ସ୍ଵପ୍ନ ଥାଉ
ଫୁଲ ଥାଉ
ହସ ଥାଉ
ଆଖିର କଜଳପରି
ତୁମସାଥେ ସବୁ ଥାଉ
ଜୀବନର ଛୁଆଁ
ତୁମଠୁ ମୋତେ ମିଳୁଥାଉ |