ଶୀତ ସକାଳର ପାହାନ୍ତି ଖରା

ଶୀତ ସକାଳର କାକର ବୁନ୍ଦାରେ

ସୂର୍ଯ୍ୟଙ୍କ ସୁନେଲି ରଶ୍ମୀ

ଅତି ମନଲୋଭା ଦୃଶ୍ୟକୁ ଦେଖି

ଆଖି ହୋଇଯାଏ ଖୋସି l

ଶୀତ ସକାଳର ପାହାନ୍ତି ଖରାରେ

ଚା ଧରି କରି ହାତେ

ବୁଢ଼ାବୁଢ଼ୀ ଦୁହେଁ ଆନନ୍ଦ ମନରେ

ବସିଛନ୍ତି ସାଥେ ସାଥେ l

ବାରଣ୍ଡା ଉପରେ ଚଟେଇ ବିଛେଇ

ତେଲ ଶିଶିଟିକୁ ନେଇ

ଶୁଷ୍କ ଶରୀରେ ତେଲକୁ ଲଗାଇ

କହନ୍ତି ଯିବେ ଗାଧୋଇ l

ବୁଢ଼ା କହୁଅଛି ବୁଢ଼ୀକୁ ଅନେଇ

ଏ ବର୍ଷ ପ୍ରଚଣ୍ଡ ଶୀତ

ହାଡ଼ ଭଙ୍ଗା ଶୀତ ସହି ହେଉନାହିଁ

ଦେହେ ନାହିଁ ଆମ ରକ୍ତ l

ବିଦେଶରୁ ପୁଅ ଘରକୁ ଆସିଲେ

ଆଣିବ ଗୋଟିଏ ଯନ୍ତ୍ର

ଅତି ଆନନ୍ଦରେ ଶୋଇବା ରାତିରେ

ଜପି ଗାୟତ୍ରୀ ମନ୍ତ୍ର l