ଋତୁ ଚକ ଯାଏ ଘୁରି
ଋତୁ ଚକ ଯାଏ ଘୁରି
ପ୍ରଫୁଲ କୁମାର ସାହୁ
ଟାଇଁ ଟାଇଁ ଖରା ନଇଁ ନଇଁ ଗଲା
ଆକାଶେ ବଉଦ ଭାସେ,
କଳା ମେଘ ଦେହେ ବିଜୁଳି ଚମକେ
ଆହା କି ସୁନ୍ଦର ଦିଶେ l
ଘଡ଼ି ଘଡ଼ି ଘଡ଼ି ବାଇଦ ବଜାଏ
ଆକାଶରେ ଘଡ଼ଘଡ଼ି,
ଧାର ଧାର ମେଘ ଆକାଶକୁ ଝରି
ପୁରିଲାଣି ବିଲ ବାଡ଼ି l
କଳାମେଘ ଦେଖି ସାରୁ ଗଛ ମୂଳେ
ବେଙ୍ଗୁଲି ଗାଉଛି ଗୀତ,
ନାଲି ଗୁରୁଗୁରୁ ସାଧବ ବୋହୂଏ
ହୋଇଲେଣି ଆତଯାତ l
ଦାରୁଣ ଗ୍ରୀଷମ ଦୂରେଇ ଯାଇଛି
ଚଷା ପୁଅ ମନ ଖୁସି,
ବରଷାରେ ଭିଜି ଚାଷ କାମେ ଲାଗେ
ଗୀତ ଗାଈ ହସିହାସି l
କିଆ କେତକୀର ବାସରେ ମହକେ
ପାଟ ଗୋହିରିର ବାଟ,
କଦମ୍ବ, ମାଳତୀ, ତଗର ମେଳରେ
ବସିଛି ଫୁଲର ହାଟ l
ଜହ୍ନି, ଭେଣ୍ଡି, ଲାଉ, କଖାରୁ, କାକୁଡ଼ି
ବାଡ଼ିରେ ଯାହାକୁ ଯେତେ,
ଆଷାଢ ମାସରେ ଶ୍ରୀଗୁଣ୍ଡିଚା ଯାତ
ଜଗନ୍ନାଥ ବିଜେ ରଥେ l
ବରଷା ଅଟଇ ଜଗତର ମିତ
ପାଳଇ ବରଷି ବାରି,
ଶୀତ, ଖରା, ପରେ ଆସିଛି ବରଷା
ଋତୁ ଚକ ଯାଏ ଘୂରି l