ଓଡ଼ିଶାର ପ୍ରାଣ ମଧୁସୁଦନ
ଓଡ଼ିଶାର ପ୍ରାଣ ମଧୁସୁଦନ
ଗୋରାକବରର ସ୍ୱଚ୍ଛ ଶୁଭ୍ର ଆତ୍ମା କିମ୍ପାଇଁ କର ରୋଦନ,
ଜାତି ପ୍ରାଣସିନ୍ଧୁ୍ ଯା'ର ରକ୍ତବିନ୍ଦୁ ତୁମେ ସେ ମଧୁସୁଦନ ।
ପ୍ରଥମ ଓଡ଼ିଆ ପରିଚୟ ତବ ପ୍ରଥମ ସ୍ନାତ୍ତକୋତ୍ତର,
ପ୍ରଥମ ବିଦେଶାଗତ ପାଠପଢା ପ୍ରଥମ ମନ୍ତ୍ରୀ ପ୍ରବର।
ପ୍ରଥମ ଓଡ଼ିଆ ଉଦ୍ୟୋଗୀ ଉତ୍କଳ ଟ୍ୟାନେରୀର ପ୍ରତିଷ୍ଠାତା,
ପ୍ରଥମ ଓଡିଆ ଅଧିବକ୍ତା ବର ଉଡ୍ରଭାଷା ତ୍ରାଣକର୍ତ୍ତା ।
ସ୍ୱଧର୍ମ ତେଜିବି ସ୍ୱାଭିମାନ ହେତୁ ଜଗନ୍ନାଥ ସ୍ୱତ୍ୱ ରକ୍ଷା,
ଲଢିଲ ଇଂରେଜ ସାଥିରେ ଠାକୁର ରାଜା କରିବେନି ଭିକ୍ଷା ।
ସମ୍ମିଳନୀ କଲ ରକ୍ଷା କରିବାକୁ ସ୍ୱାଭିମାନ ଓଡ଼ିଆର,
ସତ୍ୟଭାମାପୁର ସତ୍ୟସାରଥି ହେ ଗଉରବ ଉତ୍କଳର ।
ଡାକଦେଲ ତୁମେ "ଉତ୍କଳ ସନ୍ତାନ ଉଠିବୁ ତୁ କେତେ ଦିନେ,
ପୁରୁବ ଗୌରବ ପୁରୁବ ମହିମା ପଡୁନାହିଁ କିରେ ମନେ ?"
ସ୍ୱାଭିମାନ ଓଡ଼ିଶାର ବଜାୟ ରଖିଲ ନିଜେ ହେଲ ଦେବାଳିଆ,
ଉତ୍କଳ ଟ୍ୟାନେରୀ ଝୁରୁଛି ତୁମକୁ ଫାଟିଯାଏ ତାର ହିଆ ।
ଧର୍ମ ପିତାଙ୍କର କନ୍ୟା ଶୈଳବାଳା କଲେଜ ସ୍ଥାପନ କରି,
ଅମର କରିଛ କୃତଜ୍ଞତା ତବ ନୁହେଁ କେହି ସମ ସରି ।
ଶୁଭ୍ରବସନ ଚୀରକୁମାର ହେ ଓଡ଼ିଶା ଯୁଦ୍ଧ ଜଞ୍ଜାଳେ,
ଜୀବନକୁ ତବ ବାଜି ଲଗାଇଲ ଓଡିଆ କି କେବେ ଭୁଲେ !
ପାଠ ପଢିବି ମୁଁ କାଳିଆ ଘୋଡାରେ ଚଢି ମଧୁ ବାବୁ ସଂଗେ,
ଲଢିବି -ଏ ମନ୍ତ୍ର ଦିଏ ପ୍ରତି ମାଆ ଓଡିଆ କି ପଣ ଭାଂଗେ !
ଓଡ଼ିଆ ପୁଅଟି ପାଠ ପଢି ଆଜି ପ୍ରଥମେ ଭୁଲେ ଓଡ଼ିଆ,
ବାପା ମାଂକୁ ଡାଡି ମମ୍ମି ଡାକି ସିଏ ନିଜକୁ କରେ ଦେଢିଆ ।
ଅପ୍ରେଲ ଅଠେଇଶ ସ୍ୱନକ୍ଷତ୍ର ତବ ମୂର୍ତିରେ ଲଂଵାଇ ମାଳ,
କର୍ତ୍ତବ୍ୟ ଆମର ଶେଷ କରୁ ଆମେ ସହଜେ ତ ଫାଳଫାଳ ।
ବିଶ୍ୱେଶ୍ୱର ମାଝୀ