ନିଶ୍ଚୟ ଆସିବେ ସିଏ

ରାବୁଥିଲା କୁଆ, ଅଗଣାରେ ଆଜି

ନିଶ୍ଚୟ ଆସିବେ ସିଏ ,

ଗଲା ଫଗୁଣରୁ ଏଇ ମନଟିକୁ

ଚୋରେଇ ଅଛନ୍ତି ଯିଏ ।

ସହରରେ ରହି ଉଚ୍ଚଶିକ୍ଷା ଲାଭ

କରନ୍ତି ଗାଆଁରୁ ଯାଇ ,

ଲେଖା-ଯୋଖା ସମ୍ପର୍କରେ ହେବେ ସିଏ

ସୁଷମା ନାନୀର ଭାଇ ।

ଦୋଳଯାତ ଆଉ ଦଶହରା ବେଳେ

ନାଟକରେ ସିଏ ଥିଲେ ,

ଭଲ ଅଭିନୟ କରିଛନ୍ତି ବୋଲି

ଲୋକମାନେ ମତ ଦେଲେ ।

ସୁଷମା ନାନୀଠୁ ପାଠ ବୁଝିବାକୁ

ଯାଇଥିଲି ଖରାବେଳେ ,

ଦେଖା ହୋଇଥିଲା ତାଙ୍କସହ ସେଠି

ବସିଥିଲେ ପଙ୍ଖା ତଳେ ।

କଥା ଛଳେ ମୋତେ ପଚାରି ବୁଝିଲେ

ମୋ ପାଖରୁ ସବୁ ତଥ୍ୟ ,

ସୁଯୋଗ ଉଣ୍ଡି ସେ ପରେ ପଚାରିଲେ

' ତୁ ହେବୁ କି ମନ ମିତ ! 

ଆସନ୍ତା ବରଷ ଦୋଳଯାତ ପରେ

ହେବ ମୋର ବାହାଘର ,

ସୁଷମାଠୁ ସବୁ ଖବର ବୁଝିକି

ମତାମତ ଦେବୁ ତୋର ।'

ନାହିଁ କହିବାକୁ କାରଣ ନ ଥିଲା

ଲାଜରେ ପୋତିଲି ମୁହଁ ,

କହିଲି-ମୁଁ ରାଜି,ଆଉ କେବେ ଦେଖା

ହେବ ତୁମସହ କୁହ !

ଏଇ ତିଥିକୁ ସେ କଣ୍ଟ ଦେଇଥିଲେ

ଖବର ଅଛନ୍ତି କରି ,

ସେଇଥିପାଇଁକି ସଜ ହୋଇ ମୁହିଁ

ଖୁସିରେ ବୁଲୁଛି ଘୂରି ।।