ନବ ବର୍ଷା
ନବ ବର୍ଷା
1 min
286
ବସନ୍ତ ଦୂତର ଶୋଭା ନିରେଖିଣ
ବସନ୍ତ ଦୂତ ଯେ’ ହୋଇଲା ଉଚ୍ଛନ,
ବସନ୍ତ ଦୂତର ଶାଖାରେ ବସିଣ
ବସନ୍ତ ଦୂତ ତୋଳିଲା ତତକ୍ଷଣ ।
ଏସନ କାଳରେ ନବଘଟ ଘନ
ଗଗନ ପ୍ରାଙ୍ଗଣ କରିଦେଲା ଘନ,
ବଜ୍ର ସଙ୍ଗତରେ ଗରଜିଲା ଘନ
ପ୍ରାଣୀହୃଦେ ଭୟ ଦେଲା ଘନଘନ ।
ଗଗନ ମାର୍ଗରେ ଦେଖି ବର୍ଷାଘୋଷ
ମଥା ଟେକି ଧ୍ୱନି କଲା ବର୍ଷାଘୋଷ,
ବରାକ ବାସେ ଯେ’ କରୁଛନ୍ତି ବାସ
ବରାକ ବୋଲିଣ ହୋଇଲେ ବିରସ ।
ବକୁର ବନଦ ଆଚ୍ଛାଦେ ଲୁଚିଲା
ବକୁର ବନଦ ଅଙ୍ଗରେ ଖେଳିଲା,
ଘନଘନ ଘନୁଁ ବାରି ବରଷିଲା
ଦିବସ ଯାମିନୀ ବାରି ଯେ’ ନୋହିଲା ।
ନଳିନୀ ହୃଦୟ ପୂର୍ଣ୍ଣ ହେଲା ଜଳେ
ନଳିନୀର ଶିରୀ ହରିନେଲା ହେଳେ,
ନାନା ବଲ୍ଲି ନୀର ଲଭି କ୍ଷେତମାଳେ
ଅଙ୍କୁରିତ ହୋଇ ବଲ୍ଲିକୁ ମଣ୍ଡିଲେ ।