ଦେଖିବି ମୁଁ ବ୍ରହ୍ମାଣ୍ଡସୁନ୍ଦରୀ
ଦେଖିବି ମୁଁ ବ୍ରହ୍ମାଣ୍ଡସୁନ୍ଦରୀ
ଦେଖିବି ମୁଁ ବ୍ରହ୍ମାଣ୍ଡସୁନ୍ଦରୀ
ଲଲାଟେନ୍ଦୁ କବି: ୨୦୧୬୧୧୨୯-୦୭୩୯
ଦେଖିନି ବଦନ ଗୋରୀ ଦେଖିବି ପ୍ରଥମକରି
ଶୁଣିଛି ତ ଭୁରିଭୁରି ତୁ'ଟା ବ୍ରହ୍ମାଣ୍ଡସୁନ୍ଦରୀ || -୧
ରସନା ରଖିଲେ ମାରି କାନ୍ଦିବୁ ତୁ ବୁକୁଚିରି,
କହିବି ସାହସ କରି ଯାଉଛି ମୁଁ ଡରିଡରି || -୨
ନୟନୁ ପର୍ଜନ୍ୟ ପରି ଝର୍ଝର ଝରିବ ବାରି;
ତୋଲାଗି ଅବଳା ନାରୀ ହେବି କି ମୁଁ ମିଥ୍ୟାଚାରୀ ? -୩
ସହିବୁ ଶୁଣି ବିଚାରି ଯାଇଛି ସେ ପରକରି;
ତୁ ଥିଲୁ ତା ସହଚରୀ ସେ ତୋ ଢାଲ, ତରବରୀ || -୪
କରିଥିଲୁ ସାତଫେରି ଶଙ୍ଖାଚୂଡ଼ି ସଜ ଧରି;
ଫୁଟୁଥିଲା ଫୁଲଝରି ବାଜୁଥିଲା ଭେରୀତୁରୀ || -୫
ଚାହିଁଲେ ପଛକୁ ଫେରି ଲାଗୁଥିବ କାଲିପରି,
ଆଣିଲା ଚଢ଼ି ସବାରୀ କୋକେଇରେ ଯିବ ଫେରି || -୬
ଅଦିନ ବରଷା ବାରି ସାଥେ ଏ ଯେ ଘଡ଼ଘଡ଼ି,
ଶୁଣିବୁ କି ଦମ୍ଭଧରି ଭୂତଳେ ପଡ଼ିବୁ ଝଡ଼ି ? -୭
ଦେଖିବି ମଉନ ମାରି; ସମ୍ଭାଳିଲେ ହାତ ଧରି
କହିବେ ତୁ ବାରନାରୀ, ମୋତେ ତୋର ବ୍ୟଭିଚାରୀ || -୮
ଥିବି ତୋ ପାଶେ ସୁନ୍ଦରୀ ଛାତିକୁ ପଥର କରି,
ଘେରିଘେରି ପୁର ନାରୀ ଆଖି ହେବେ ଠରାଠରି || -୯
ଆକାଶେ ଆସୁଛି ମାଡ଼ି ଘନ ମେଘ ଘଡ଼ଘଡ଼ି
ଖୋଲିବି କାହାଣୀପେଡ଼ି ବେଳ ନଯାଉଣୁ ବୁଡ଼ି || -୧୦
ଦେଖିବି ପ୍ରଥମ କରି ବନ୍ଧୁପତ୍ନୀ ମନଭରି,
କାନ୍ଦୁଥିବୁ ଝୁରିଝୁରି, ମୁଁ ଥିବି ପଥର ପରି || -୧୧