Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Prasanna Kumar Madala

Others

3  

Prasanna Kumar Madala

Others

ଅବଳା

ଅବଳା

1 min
6.5K


ଓସ୍ତ ପତ୍ର ଫଡ ଫଡ

ଥରୁଥିଲା ଅବଳାଟେ ପରି

ସମୟର ଚକ ଘୂରେ

ନିତି ଦିନ ବିରତ ନହୋଇ ,

କାନ୍ଦକାନ୍ଦ ପିଲାଟିକୁ

ଅନ୍ଧାରୁଆ କକ୍ଷେ ଭିଡି ଧରି

ଛଟପଟ ରାଧା ନାନୀ

ହାଇ ମାରି ଚେଇଁଥାଏ ଶୋଇ ।

ରାତି ଏଡ଼େ ବାଘ ପରି

ଏବେ ଲାଗେ ଭାରି ନିଛାଟିଆ

ଝରକାରୁ ବାହାରକୁ

ଦେଖି ସାରି ଦମ୍ଭ କରେ ମନ ,

ଛାତି ତଳେ ଧକଧକ

ଥରି ଉଠେ ଯେବେ ତାର ହିଆ

ଆଣ୍ଠୁ ଭାଙ୍ଗି ମୁହଁ ଢାଙ୍କେ

ପିଲା ମୁଖେ ଭରି ତାର ଥନ ।

ରାତି ହେଲେ ସ୍ଵାମୀ ତାର

ମହୁ ଖୋଜେ ଉଡି ବାଟିକାରେ

ଉପବନେ ତରୁ ଲତା

ଛୁଇଁ କେତେ ଫେରଇ ପ୍ରଭାତେ ,

ଡରି ମରି ସ୍ପନ୍ଦନ ତା'

ଦ୍ରୁତ ଚାଲେ ବଢ଼ି ନାଟିକାରେ

ଦେଖି ଦେଖି ହାତ ଶଙ୍ଖା

ନୀରବରେ ଖାଲି ଅଶ୍ରୁ ପାତେ ।

ଭାଗ୍ୟ ଦୋଷେ ଆଖି କୋଣେ

ଲୁହ ଶୁଖେ, ସରେନାହିଁ ଦିନ

ଦିଗ ପାଳେ ସାକ୍ଷୀ ରଖି

ହୋମକୁଣ୍ଡେ ଯିବା ପାଇଁ ଜଳି ,

ବାହା ହୋଇ ଆସିଲାଠୁ

କି କରିବ କପାଳ ତ ହୀନ

ସ୍ଵାମୀ ଯେବେ ସତ୍ୟ ଭୁଲେ

ମୋହେ ଅନ୍ଧ ମହୁମାଛି ଭଳି ।

ପାରିଲାନି ରାଧା ନାନୀ

ବଞ୍ଚିବାର ସଂଗ୍ରାମରେ ଯୁଝି

ଫେରିଗଲା ବାପଘରେ

ଉପାୟ ତ ନଥିଲା ବି ଆନ ,

ସଂସାରର ମାୟା ଫାଶ

ସହଜରେ ନ ପାରୁଣୁ ବୁଝି

ଏକାକିନୀ ଆବେଶରେ

ଆଶ୍ରା ଲୋଡେ ନିରାଶ୍ରିତ ପ୍ରାଣ ।

ଆସିଲା ଯେ' ପଶୁ ପ୍ରାୟେ

ଶୁଣିଲାନି ତାର ଅନୁନୟ

ନିବେଦିଲା ହାତ ଯୋଡ଼ି

ଛାଡିଦିଅ ବାରେ ଦୟା କର ,

କହୁ କହୁ ଝାମ୍ପ ମାରି

ଦେଖାଇଲା ନିଜ ପରିଚୟ

ଦେହ ତାର ଲୁଟି ନେଲା

ପିପାସୁ ତ ନଥିଲା ବି ଡର ।

ଅଦୂରରେ କଳାନାଗ

ନିର୍ଭୟରେ ଟେକିଦେଲା ଫଣା

ଫିଟିଗଲା ଗୁହାଳରୁ

ଧେନୁଟିଏ ନିଜ ବାଟ ହୁଡି ,

ଅଶନି ପଡିଲା ବେଗେ

ବୁଦ୍ଧିଶୁଦ୍ଧି ହୋଇଗଲା ବଣା

ତ୍ରାହି ତ୍ରାହି ଡାକ ଛାଡି

ଗଛଡାଳୁ ପକ୍ଷୀ ଗଲେ ଉଡ଼ି ।

ପ୍ରସନ୍ନ କୁମାର ମାଦଳା


Rate this content
Log in