ମାୟା ମରିଚୀକା....
ମାୟା ମରିଚୀକା....
ହେଇଟି ଦେଖାଯାଉଛି ସେଇ
ଦୂର ଦିଗବଳୟ
ଯେଉଁଠି ଛାଡି ଆସିଛି
ମୋ ସ୍ୱପ୍ନ ମାନଙ୍କ ସହ
ଅକୁହା କାହାଣୀ ମାନଙ୍କୁ l
ସେଉଠୁ ହିଁ ଲମ୍ୱିଥିଲା
ମୋ ପ୍ରେମର ରାସ୍ତା
ଚାରି ଦିଗକୁ -
ରାଜ ଉଆସକୁ, ପରୀ ରାଇଜକୁ
ସ୍ୱର୍ଗପୁରକୁ ଆଉ ଏଇ ନର୍କକୁ l
ଜାଣି ନଥିଲି
କଳ୍ପନା କରି ନଥିଲି
କିମ୍ୱା ସ୍ୱପ୍ନରେ ବି ଭାବି ନଥିଲି
ଏଇ ପ୍ରେମର ରାସ୍ତା
ଅକ୍ଟୋପସ୍ ପରି ଆକୃଷ୍ଟ କରି
ଟାଣିନେବ ମୋତେ
ସେଇ ମାୟା ନଗରୀକୁ
ମରିଚୀକାରେ ଭର୍ ପୁର୍
ପ୍ରେମର ସହରକୁ l
ସେଇ ମାୟା ମରିଚୀକାରେ
ଅହରହ ଦେଖେ
ପ୍ରେମିକାକୁ ମୋର
ରାଜକୁମାରୀ ରୂପରେ
ନୂପୁରର ଛନ୍ଦେ ଛନ୍ଦେ
ଚାଲୁଥାଏ ଶବ୍ଦ ତୋଳି ତୋଳି
ମୋ ହୃଦୟ ଭିତରେ l
ପର ମୁହୂର୍ତ୍ତରେ
ପରୀକନ୍ୟା ପାଲଟି ଯାଇ
ମନୋମୁଗ୍ଧକର ଖିଲିଖିଲି
ମନଖୋଲା ହସରେ
ମୋତେ ଆହ୍ଲାଦିତ କରେ l
ପୁଣି କେତେବେଳେ
ସ୍ୱର୍ଗର ଅପସରା ସାଜି
ସୌନ୍ଦର୍ଯ୍ୟର ମାଧୁର୍ଯ୍ୟ ଦେଖାଇ
ହାତଠାରି ଡାକି
ମୋ ମନକୁ ବିମୋହିତ କରେ l
ଏଇ ଯୌବନର ନିଶାରେ
ଇନ୍ଦ୍ରିୟର ପ୍ରତିଟି ଇଚ୍ଛାକୁ
ଚରିତାର୍ଥ କରିବାକୁ ଯାଇ
ଆଖିରୁ ନିଦ ହଜିଛି
ଭୋକ,ଶୋଷ ଭୁଲିଛି
ଅବଶୋଷରେ ମନ ଭରିଛି
ବିଶ୍ୱାସ ବି ମରିଛି l
ବିଶ୍ୱାସ ଘାତକତା ସହି ସହି
ଅନେକ ଅକୁହା କଥା
ମନରେ ସଇତିରଖି
କେବଳ ଗୁଡେ
ନର୍କ ଯନ୍ତ୍ରଣା ପାଇ ଚାଲିଛି l
*************************
ପ୍ରଶାନ୍ତ କୁମାର ବେହେରା
ଅଧ୍ଯାପକ , ରାଜନୀତି ବିଜ୍ଞାନ ବିଭାଗ,
ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂଶାସିତ ମହାବିଦ୍ୟାଳୟ,
ଜଗତସିଂହପୁର l
ଦୂରଭାଷ - ୯୪୩୭୧୩୫୯୧୬