ଫଗୁଣ ଫଗୁ
ଫଗୁଣ ଫଗୁ
ଆହା କି ! ସୁନ୍ଦର ମୃଦୁ ସମୀରଣ
ବହେ ଥିରିଥିରି ପ୍ରକୃତି କୋଳେ
ଦକ୍ଷିଣଦିଗରୁ ଚୋରା ବସନ୍ତଟା
ଫଗୁଣକୁ ଆଣି ଅବିରଖେଳେ ।
ଲାବଣ୍ଯସୁନ୍ଦରୀ ହଳଦୀବସନ୍ତ
ତା' ସାଥେ କେକୀର ସପ୍ତରାଗସ୍ବର
ମଧୁକରମତ୍ତେ ଉନ୍ମାଦିତ ଚିତ୍ତେ
ସ୍ବାଗତେ ଚିତ୍ରିତ ରୂପ ସମ୍ଭାର ।
ବନେ ଉପବନେ ପାଦପ ମଣ୍ତନେ
ନବ ପଲ୍ଲବିତ ରୂପେ ବିରାଜ
ପ୍ରଜାପତି ଉଡି ଫୁଲେଫୁଲେ ଝୁଲି
ଗୁଣୁ ଗୁଞ୍ଜରଣେ ଭ୍ରମର ସଜ ।
ପଳାସ ଓଠରେ ହସ ଆନମନା
ଚହଟଇ ମଲ୍ଲୀ ମଧୁମୂର୍ଛ୍ଛନେ
ଅଧିରେ ବିଭୋରେ କସିଆମ୍ବନାଚି
ରଙ୍ଗଖେଳିବାକୁ ପକାଏ ମନେ ।
ପଞ୍ଚୁଦୋଳପର୍ବେ ଆସନ୍ତି ଗୋବିନ୍ଦ
ପ୍ରତିଟି ହୃଦୟ ଜିଣି ବିମାନେ
ଆସ ସର୍ବେ ମିଳି ଫଗୁଣ ଫଗୁରେ
ଖେଳିବାକୁ ରଙ୍ଗ ଆନନ୍ଦ ମନେ ।
ଚୋରା ଚଇତିର ପହିଲି ଛୁଆଁରେ
ନାଲି,ନେଳି ରଙ୍ଗ ମାରି ପିଚକାରି
ଖିଲିଖିଲି ହସି ହସାଇ ସଭିଙ୍କୁ
ମେଳିହୋଇ ଖେଳି ଫଗୁ ଚାଚେରୀ ।
ବୈଜୟନ୍ତୀ ସାହୁ ,
ନରସିଂହପୁର,ଶ୍ରୀରାମନଗର
ପିପିଲି,ପୁରୀ