ସହରରେ ବର୍ଷା

ଆଉ ଆଜିକାଲି

ଆଗ ଭଳି ବର୍ଷା ହେଉନାହିଁ

ନିରୂପିତ ସମୟରେ

ପରିଚିତ ବାସ୍ନାର ମହକ

ପବନ ଦୋଳିରେ ଭାସି

ଦେହ ମନ ଶିହରାଉ ନାହିଁ ।

ବର୍ଷା କଥା ଭାବି ବସିଲେ

ମନଭରି ଭିଜିବାର

ଉଦ୍ଦୀପନା ଜାଗୁନାହିଁ

ବେଗନଭିଲ୍ଲାର ଧୂଳିମଖା

ଧୁସର ପତ୍ରରେ

ଟୁପ୍ ଟାପ ପହିଲି ବର୍ଷାର ପରଶ

ଚୁପ୍ ଚାପ ଭଲପାଏ ଭଲପାଏ କହି

ଚମକାଇ ଦେବାର

ଦୁଷ୍ଟାମୀ କରୁ ନାହଁ ।

ବର୍ଷାପରି ଅବିକଳ

ତୁମ ସ୍ଵରର ସାଂଦ୍ରତା

ତୁମ ଆଲିଙ୍ଗନର ନିବିଡ଼ତା ି ସେଭଳି ଉଷ୍ମତା ଯୋଗାଏନି ,

ନାଗଫେଣୀର କଣ୍ଟକିତ ଶାଖା

ଛାତିଭେଦି ଆରପାର ହୁଏ ।

ସିଂଥେଟିକ ଶାଢ଼ୀରେ

ଟୋପା ଟୋପା ବର୍ଷା ବିନ୍ଦୁ

ସରସର ଭେଦେ ନାହିଁ

ଶିତଳତା ଛୁଏଁନାହିଁ ଦେହ ।

ସୁଖଦ ସିକ୍ତତାରେ

ଶିହରି ଜଡାଇ ଯିବାର

ଉଦ୍ଧିପନା ଚହଲାଏ ନାହିଁ

ଆଉ ଆଜିକାଲି

ଆଗ ପରି ବର୍ଷା ହେଉନାହିଁ ।

**

© ବିଦ୍ୟୁତପ୍ରଭା ଗନ୍ତାୟତ