ଶିକ୍ଷା ବ୍ୟବସ୍ଥା

ସଦ୍ୟ ଅବସ୍ଥାରେ ସତରେ ଲାଗୁଛି ଶଙ୍କା

ଶିକ୍ଷା ବ୍ୟବସ୍ଥାର ମେରୁଦଣ୍ଡ ଏବେ ବଙ୍କା

ଘରୋଇକରଣ ପରିଣାମ ଦେଖ

ଡିଗ୍ରୀ ହୋଇଲାଣି ବିକା

ସହଜେ ମିଳୁଛି ଯାହା ପାଶେ ଅଛି ଟଙ୍କା ।

ଅନୁଷ୍ଠାନ କେତେ ଗଢିଲା ଗଗନଭେଦୀ

ମେଧାବୀ ଛାତ୍ରଙ୍କୁ ଦୁଆରୁ ଦିଅନ୍ତି ଖେଦି

ଉଚ୍ଚଶିକ୍ଷା ଆଜି ମେଧା ବଦଳରେ

ଅର୍ଥ ବଳେ ହୁଏ ଯଦି

ଆପଣା ଜିହ୍ବାକୁ ଆପେ ହିଁ ରଖିଛୁ ଛେଦି ।

ଅଳ୍ପମାତ୍ର ଯାହା ଅଛି ସରକାରୀ ନାମେ

ବୈଷୟିକ ଶିକ୍ଷା ମିଳୁଛି ଅଧିକ ଦାମେ

ଅର୍ଥ ଅଭାବରୁ ବୁଦ୍ଧିମତା ଥାଇ

ନଲାଗେ ଗରୀବ କାମେ

ସତେକି ଏମିତି ବିକାଶ କରିବା ଆମେ ?

ବ୍ୟବସ୍ଥା ଯେମିତି ଚାଲିଛି ଆଗକୁ ବଢି

ପ୍ରସ୍ତୁତି ନଥାଇ କିଏ ବା ପାରିବ ପଢି

ତାଲିମ ନାଆଁରେ ଶୋଷଣ ଚାଲିଛି

ଅନୁଷ୍ଠାନ ମାନ ଗଢି

କେତେ ବଣମଲ୍ଲୀ ଅକାଳେ ଯାଆନ୍ତି ଝଡି ।

ବିଷମ ସଙ୍କଟେ ପଡିଛି ଦେଶର ଶିକ୍ଷା

ଅଗ୍ରଗତି ପାଇଁ ଧନ ହେଲା ମାତ୍ର ଦୀକ୍ଷା

ତେଲ ଅଭାବରୁ କଦବା କେଉଁଠି

ଜଳେ କି ଦୀପକ ଶିଖା

ଗରୀବ ମେଧାବୀ ସଡକେ ମାଗଇ ଭିକ୍ଷା ।