ସୃଷ୍ଟିର ଗୋଲକ ଧନ୍ଦା
ସୃଷ୍ଟିର ଗୋଲକ ଧନ୍ଦା
ଗୋଟିଏ ବୃନ୍ତର ଦୁଇଟି ପାଖୁଡ଼ା
ଜଣେ ଆନ ପ୍ରେମେ ବନ୍ଧା,
କେହିତ କାହାକୁ ନ ଛାଡନ୍ତି କ୍ଷଣେ
ଦୁହେଁ ଦୁଇ ଦେହେ ଛନ୍ଦା।
ଦୁଇଟି ଶରୀର ଆତ୍ମା ତ ଗୋଟିଏ
କରିଛି ସୃଷ୍ଟି ବିଧାତା,
ଏମିତି ବନ୍ଧନ ଏ ଧରାଧାମରେ
ନିଜେ ବନ୍ଧା ସୃଷ୍ଟିକର୍ତ୍ତା।
ଶିବଶକ୍ତି ଠାରୁ ବିଷ୍ଣ ଲକ୍ଷ୍ମୀ ପୁଣି
ରାଧାକୃଷ୍ଣଙ୍କର ଲୀଳା,
କେଦାର ଗୌରୀ ଲୈଲା ମଜ୍ ନୁ
ତାଜମହଲ ଭଳି କଳା।
ଅଜଣା ଅଶୁଣା ଅଦେଖା ଜୀବନ
କ୍ଷଣେ ପଡିଥାଏ ବନ୍ଧା,
ଏମିତି ଡୋରରେ ବାନ୍ଧି ହୋଇଯାନ୍ତି
ଏ ବଡ଼ ଗୋଲକ ଧନ୍ଦା।