ମୁଁ ସାଧ୍ଵୀ କହୁଛି

ମୁଁ ଏକ ସାଧ୍ଵୀ କହୁଛି..

ଈଶ୍ଵରଙ୍କ ସାନିଧ୍ୟରେ ଅଛି ।

ଘର ଲୋକ ଆଜି ବହୁତ ଖୁସି

ସାକ୍ଷାତ ଈଶ୍ଵରଙ୍କୁ ସମୀପେ ଲଭି।

ତାଙ୍କ ମନୋରଥ ପୂର୍ଣ୍ଣ ହୋଇଛି ।

ଆଉ ମୁଁ...

ଝିଅ ହବାର ଋଣ ଶୁଝୁଛି;

ମୁଁ ଏକ ସାଧ୍ଵୀ କହୁଛି ।

⁠ସାଧାରଣ ମନୁଷ୍ୟ ନୁହନ୍ତି ସେ ତ

ପରମପିତାଙ୍କ ସମ ;

ତାଙ୍କ ଆସ୍ଥାନ ଆଶ୍ରମ ନୁହେଁ ଯେ...

ସେ ତ କାଳେ ମର୍ତ୍ତ୍ୟେ ବୈକୁଣ୍ଠର ସ୍ଥାନ ।

ମର୍ତ୍ତ୍ୟର ଈଶ୍ଵର ସେ..

ଏ ଶରୀର ମନ ଆତ୍ମାରେ ତାଙ୍କ ଅଧିକାର ପୂର୍ଣ୍ଣ ।

ଚାହିଁବେ ଯେପରି ଖେଳିବେ ସେପରି

କେବଳ ସମର୍ପି ଦେବାରେ ହିଁ ଅଛି

ମୋର ପରମ ଧର୍ମ ।

ସ୍ଵାର୍ଥର ଅନ୍ଧ ଗଳିରେ

ଯେବେ ବାଟ ବଣା ହୁଏ ମନ ;

ଲହରେଇ ଉଠେ ଅସୁମାରି ଇଚ୍ଛା

ଆଉ ଫିକା ପଡିଯାଏ

ସବୁ ସମ୍ପର୍କର ସ୍ଵାଭିମାନ ।

ସ୍ଵାର୍ଥ ଆଉ ପରମାର୍ଥ ଲାଭ ର ଖେଳରେ

କେତେ ଯେ ଇଜ୍ଜତ ଖିନଭିନ ହୁଏ

ଧର୍ମ ନାମେ ବନ୍ଧା ପଡୁଥାଏ ନିତି

ନିରୀହ ଜୀବନ ଆଉ ଯୌବନ ।

ଆତ୍ମ ଘୋଷିତ ଭଗବାନ ଯେବେ

ପାଲଟନ୍ତି ଦୁଃଶାସନ I

ସେ ବାସନାର ଯଜ୍ଞ ବେଦୀ ପରେ

କେତେ ସ୍ୱାଧ୍ଵୀ ଯେ ବଳି ପଡନ୍ତି ଅକାରଣ ।

ମର୍ତ୍ତ୍ୟ ଦେବତାଙ୍କ ଭୋଗରେ

ଆଜି ବନ୍ଧା ମୋର ଇହ ଭାଗ୍ୟ I

ଭୋଗର ସେହି କୁତ୍ସିତ ଖେଳରୁ

କାଳେ ଲଭିବି ଯେ ପରମ ମୋକ୍ଷ ।

ଦେହ ଦାହ କାମନାର ଜୁଇ ରେ

ଅସହାୟ ପତଙ୍ଗଟିଏ ମୁଁ ଜଳେ ।

ଜିଅନ୍ତା ନର୍କରେ ଛଟପଟ ହୁଏ

ମୁକ୍ତିର ପଥ ଖୋଜି ବୁଲେ I

କିନ୍ତୁ...!!! ଲୋକେ କୁହନ୍ତି

ମୋ ଝିଅ ଜନ୍ମରେ ଅଛି ସାର୍ଥକତା ;

ବଞ୍ଚି ଥାଉ ଥାଉ...

ଈଶ୍ଵରଙ୍କ ସାନିଧ୍ୟରେ ଲଭିଛି ଯେ

ଦେବୀତ୍ୱର ସତ୍ତା !

ଏ ଭାଗ୍ୟ କେତେ ଜଣଙ୍କର ଅଛି..!

ମୁଁ ସାଧ୍ଵୀ କହୁଛି

ଈଶ୍ଵରଙ୍କ ସାନିଧ୍ୟ ରେ ଅଛି..।

ବିନ୍ଦୁ ନିବେଦିତା