ଇଚ୍ଛା ପ୍ରଦୀପ

ଦୀପରେ ସଳିତା   ସଂଘର୍ଷ କରୁଛି

 ଅନ୍ଧକାରୁ ମୁକ୍ତି ପାଇଁ,

ଶ୍ରେଷ୍ଠ ଜୀବ ତୁହି  ବୋଲାଉ ସୃଷ୍ଟିରେ

   ତୋ ରକ୍ତ ଶିଥିଳ କାହିଁ ? ।୧।

ଏକତ୍ୱ ତୋହର   ନଷ୍ଟ ହେଉଅଛି

   ମିଛ ଅହଙ୍କାର ନାଦେ,

ସହଯୋଗୀ ସାଜି  ଲଢେ଼ଇ କରୁଛୁ

   ଜାତି ଧର୍ମର ପ୍ରଭେଦେ ।୨।

ଜାଗିଉଠ ଥରେ   ସମ୍ମିଳିତ ସ୍ୱରେ

    ଥରି ଉଠୁ ମହୀ ତଳ,

ଦେଖୁ ଏ ସଂସାର  ଦେଖୁ ଏ ସମାଜ

    ଏକତାର କେତେ ବଳ ।୩।

ଶରୀରକୁ ତୋର  ଦୀପଟେ ସଜେଇ

     ଇଚ୍ଛାକୁ ସଳିତା କରି,

ସେ ଦୀପରେ ଥରେ ରକ୍ତର ତେଲକୁ 

     ସ୍ୱଇଚ୍ଛାରେ ଦିଅ ଭରି ।୪।

ଇଚ୍ଛା ସଳିତାଟି   ରକ୍ତର ତେଲରେ

     ଜଳିଉଠୁ ନିମିଷକେ,

ତେଜିଉଠୁ ଥରେ  ଶରୀର ଦୀପଟି

    ସେ ଉତ୍ତାପେ ମୁହୂର୍ତ୍ତକେ ।୫।