ମୋ ନିଦ ଚୋରେଇ ନେଲା

ନୀଳ ତନୁ ଦେଖି ମନ ଦେଇଥିଲି

ନିଦ ମୋ ଚୋରେଇ ନେଲା ,

ଏଡ଼ିକି ଛଳିଆ,ଜାଣିଶୁଣି ସିଏ

ମୋ ସାଥେ କପଟ କଲା ।

କାହାକୁ ମୁଁ କହିବି ଭଲା ;

ବିହି,ଲଲାଟେ ମୋ ଲେଖିଥିଲା ।

କେଡ଼େ ଭରସାରେ ଅସୀମ ଆଶାରେ

ଧରିଥିଲି ତା'ର ପାଦ ,

ଜାଣେନା କି ଲାଗି ଅଣହେଳା କଲା

ମୋହ ସାଥେ କରି ବାଦ -

ଚିହ୍ନିବା କି ସହଜ ତାକୁ ;

ପଣ କରିଛି ପ୍ରାଣ ନେବାକୁ !

ପ୍ରାଣ ଗଲେ ଯାଉ ନାହିଁ ମୋର ଡର

ଥାଉ ତା' ସାଥିରେ ଭାବ ,

ଶୋଚନା ତେଣିକି ରଖିଦେଇଅଛି

ମିଳୁ ବା ନ ମିଳୁ ଲାଭ -

ମନେ ରାଜୁ ମୋହନ ରୂପ ;

ଦୂର ହେଉ ଏ ହୃଦୟ ତାପ ।

ବି ନିରୁପମା

ମାମୁରିଆ,ଛେଣ୍ଡିପଦା,ଅନୁଗୋଳ ।