ବୋଉ, କଥା ଦେଲି

ଜୟନ୍ତୀ ରଥ

ହସର ଦୁଆର ,

ବୁଜିବୁ ନାଇଁ ବୋଉ ,

ଲୁହର ଦୁଆର ,

ବୁଜିବି ନାଇଁ ।

ମନର ପାଣିପାଗ ,

ଭଲ ରହିବା ପାଇଁ ,

ହସ ଓ ଲୁହର ଦୁଆର ,

ଖୋଲା ରହିବା କେତେ ଜରୁରୀ ,

ମୁଁ ବୁଝିଗଲିଣି ।

ଲୁହର ସଞ୍ଜୟ କେତେ ଜରୁରୀ ,

ମନର ତାପ ତଡିବା ପାଇଁ ,

ମୁଁ ବୁଝିଗଲିଣି.... ,

ବୁଝିଗଲିଣି , ବଞ୍ଚିରହିବା ଲୋଡା ହସଟିକେ ,

ଭଗାରି – ହସକୁ ଟକ୍କର ପାଇଁ ।

ଆଗରେ ନୁହେଁ କି ପଛରେ ନୁହେଁ ,

ମୁଁ ହସିଲା ବେଳେ କି କାନ୍ଦିଲା ବେଳେ ,

ତୁ’ ଠିଆ ହୋଇଥିବୁ ମୋ’ ପାଖରେ ,

ତୋ’ ଲୁଗାକନି ଯେମିତି ,

ବାଜୁଥିବ ମୋ’ ସର୍ବାଙ୍ଗରେ ।