ସାଧବ ବୋହୂ

ସାଧବବୋହୂ ଲୋ ସାଧବବୋହୂ ,

ତରତର ହୋଇ କେଣିକି ଯାଉ-

ଆ'..ଆ ଲୋ ବସିବା ମିତ ;

ତୁ କହିବୁ ମୋତେ କାହାଣୀ ଗୋଟିଏ,

ମୁଁ ଶୁଣାଇବି ଗୀତ ।

ଶୁଣାଇବୁ ସେଇ ଅତୀତ କଥା ,

ସାଧବ ପୁଅର କୀରତି ଗାଥା-

ଜାଭା,ସୁମାତ୍ରା ସେ ଯାଇ ;

ପରତେ ନୋହୁଛି,ବୋଇତେ କେମିତି

ଆଣୁଥିଲା ଧନ ବୋହି ।

ବତାଇବୁ ପୁଣି ସେଇ କଥାଟି ,

କି ମହାନ ଥିଲା କଳିଙ୍ଗ ମାଟି-

କହିବୁ ସେ କାଳ କଥା ;

ଓଡ଼ିଆ ପୁଅଟି ଗରବେ କେମିତି,

ଚାଲୁଥିଲା ଟେକି ମଥା ।

ଶରଧାରେ ଯେବେ ଶୁଣିବୁ ବସି ,

ନାନାବାୟା ଗୀତ ଗାଇବି ହସି-

କରିବୁନି ମନ ଊଣା ;

ଏଇ ରାଇଜର ଟେକ ରଖିବୁ ଲୋ

ଯେତେ ଲକ୍ଷ୍ମୀ ସର୍ବଗୁଣା ।

ବି ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।

୭୫୯୧୨୪