ପ୍ରିୟା ଆଉ କାଶତାଣ୍ଡି
ପ୍ରିୟା ଆଉ କାଶତାଣ୍ଡି
ପ୍ରିୟା କହିଥିଲା ଆସିବ ନିଶ୍ଚୟ
ଅପେକ୍ଷା କରିବା ପାଇଁ
ବସି ବସି ମୋର ଦିନ ବିତିଗଲା
ପ୍ରତିକ୍ଷାରେ ଚାହିଁ ଚାହିଁ ।
ଭାବିଥିଲି ଟିକେ ପ୍ରେମର ଆଳାପେ
ମନଟା ଭିଜିବ ବୋଲି
ହେଲେ ସେହି ମନ ହୋଇଲା ଅଧିର
ସମୟ ଯିବାରୁ ଚାଲି ।
ବସିଲି ଯାଇ ମୁଁ ନଈ ଆର ପରେ
ମନକୁ ମୋହର ମାରି
ନିଜ ଅଜାଣତେ ଆଖିରୁ ମୋହର
ଲୋତକ ପଡିଲା ଝରି ।
ଦେଖିଲି ଆସୁଛି ଅଳସୀ ପ୍ରିୟା ମୋ
କାଶତଣ୍ଡି ହାତେ ଧରି
ଗୀତ ଗାଇ ପୁଣି ଖୁସିରେ ନାଚୁଛି
ଛୋଟ ପିଲାଟିଏ ପରି ।
କାନ ଧରି ମୋର ପାଖକୁ ଆସିଲା
କହିଲା କରିବ କ୍ଷମା
କାଶତଣ୍ଡି ସାଥେ ଖେଳୁଥିଲି ଟିକେ
ସମୟ ଦେଖିନି ଜମା ।
ଦୁଇ ହାତେ ତୋଳି ନେଲା ମୋ ମୁହଁକୁ
ଆଖିରୁ ପୋଛିଲା ଲୁହ
କହିଲା କାନ୍ଦନି ହସି ଦିଅ ଥରେ
ହୃଦନାଥ ପ୍ରାଣପ୍ରିୟ ।
କାଶତଣ୍ଡି ଶୋଭା ମନ କିଣିନେଲା
ସେପାଇଁ ହୋଇଲା ଡେରି
ଶୋଭାରେ ବିଭୋର ପାଗଳୀ ମନଟା
ସହଜେ ନ ପାରେ ଫେରି ।
ଭାବିଲି ସତରେ ପ୍ରିୟାକୁ ମୋହର
କାଶତଣ୍ଡି କ୍ଷଲ ଗୁଣି
କାଶତଣ୍ଡି ଆଉ ପ୍ରିୟାର ସମ୍ପର୍କ
ଆଜି ମୁଁ ପାରିଲି ଜାଣି ।