ଜଳାଏ ସେ ଏକା ଦେହ-ମନ ତା’ର
ଜଳାଏ ସେ ଏକା ଦେହ-ମନ ତା’ର
ଜଳାଏ ସେ ଏକା ଦେହ-ମନ ତା’ର
ପର୍ଶୁରାମ ବିଶ୍ୱାଳ
କି କହିବି ଜଗା ମୋର ମୁଣ୍ଡେ ଈର୍ଷା କାହୁଁ ଆସିଗଲା ବସି
ଯେତେ ଚାହିଁଲେ ବି ମୁକୁଳିପାରୁନି, ଧରିଛି ମତେ ଆକର୍ଷି
କିମିତି ଏ ଭୂତ ଛାଡ଼ିବ ମୋହର
କହ ମୋ କାଳିଆ ଶଶୀ ।
ନିନ୍ଦାଟି ତାହାର ଝିଅ ମୁଁ ଜାଣି ବି ତାକୁ କଲି ଆପଣାର
ବୁଝିପାରୁନାହିଁ କି ଥିଲି କି ହେଲି ସତରେ କଳାଠାକୁର
କା’ର ସୁଖ ଶୀରି ଦେଖିଦେଲେ ନେତ୍ରେ
କହୁନି ମୁଁ ପଦେ ହସି ।
ଚାହେଁ ମୋର ମନ ସଂସାରଯାକର ଯେତେ ସେ ସରଗସୁଖ
ଭୋଗ ଦଖଲ ମୁଁ କରନ୍ତି କି ଏକା, ସମସ୍ତେ ପାଆନ୍ତୁ ଦୁଃଖ
ଏ ଭାବନା ମୋର ମନରାଇଜରେ
ରାଜୁତି କଲାଣି ଆସି ।
ଆଜି ମୁଁ ବୁଝୁଛି ପରଶ୍ରୀକାତର ଈର୍ଷା ଆସିଗଲେ କା’ର
ଜଳାଏ ସେ ଏକା ଦେହ-ମନ ତା’ର, ହୁଏ ସେ ଏକା ଶିକାର
ଛଡ଼ାଇପାରିବ ନାହିଁ କେବେ ସିଏ
ଅନ୍ୟର ସେ ହସ ଖୁସି ।
ଦୁର୍ଲଭ ମଣିଷ ଜନମ ବେକାର ଆଜି ଏଇ ଈର୍ଷା ପାଇଁ
ନିଜ ସ୍ୱାର୍ଥେ ଅନ୍ଧ ହେଇଚି ଠାକୁର, ପର କଥା ଚିନ୍ତା ନାହିଁ
ଯେ’ ଦୁଃଖ ପାଇଛି ଭୁଲିହେଉନାହିଁ
ଏଇ ଈର୍ଷାକୁ ଭରସି ।
ଗ୍ରା.-ମିତ୍ରସେନପୁର, ପୋ.ଅ.-ଗମୁଁ
ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪
ଫୋନ୍-୯୮୫୩୭୫୯୭୦୦
*****