ରାକ୍ଷୀ ଉପହାର
ରାକ୍ଷୀ ଉପହାର
ରାକ୍ଷୀ ଉପହାର
ତିନି ପାଦ ଭୂମି ମାଗିନେବା ପାଇଁ
ବାମନ ରୂପରେ ଯାଇ
ଭିକ୍ଷାଂ ଦେହି ବୋଲି ଉଚ୍ଚାରିଲ ତୁମେ
ବଳି ଯଜ୍ଞଶାଳେ ଥାଇ ।
ଭକ୍ତ ପ୍ରହଲ୍ଲାଦ ବଂଶୋଦ୍ଭବ ଜ୍ଞାନୀ
ତୁମ୍ଭଙ୍କୁ ପାରନ୍ତେ ଜାଣି
ତୃତୀୟ ପାଦକୁ ମଥା ପାତି ଦେଇ
ବୋଲାଇଲେ ମହାଦାନୀ ।
ପ୍ରୀତ ହୋଇ ପ୍ରଭୁ ଦେଇଥିଲ ବର
ଛତ୍ରଛାୟା ତଳେ ରଖି
ମନୋବାଞ୍ଛା ତାର ପୂର୍ଣ୍ଣ କରି ତୁମ୍ଭେ
ସାଜିଥିଲ ଦ୍ବାରରକ୍ଷୀ ।
ଫେରିଲନି ଆଉ ବୈକୁଣ୍ଠ ପୁରକୁ
ଲକ୍ଷ୍ମୀ ଭାଳି ଗଲେ ଚଳି
ଆଜିର ତିଥିରେ ପାତାଳେ ପ୍ରବେଶି
ସମ୍ବୋଧିଲେ ଭାଇ ବଳି ।
ଲକ୍ଷ୍ମୀ ଆଗମନେ ଉଲ୍ଲସିତ ପ୍ରାଣେ
ପାଛୋଟି ନିଅନ୍ତେ ଡାକି
ଭାତୃରକ୍ଷା ପାଇଁ ବଳି ହାତେ ମାତା
ବାନ୍ଧି ଦେଇଥିଲେ ରାକ୍ଷୀ ।
ପ୍ରତିଦାନେ ରାଜା ଭଗିନୀ ସଂଖୋଳି
କହିଲେ କି ଦେବି ଆଜ
ଲକ୍ଷ୍ମୀନାରାୟଣ ମୋର ପୁରେ ଥାଉଁ
ସମ୍ପଦେ କି ଆଉ କାର୍ଯ୍ୟ !
ତ୍ରିପୁର ବିଭବ ଅଧିକାରିଣୀ ଗୋ
ଉପହାର ଦେବି କିସ
କରିଲେ ଯାଚନ ହସିହସି ପାଦେ
ଅରପିବି ମୋର ଶୀର୍ଷ ।
କମଳା କହିଲେ ପ୍ରଭୁ ଯେବେ ତୋର
ଦ୍ଵାରପାଳ ସାଜିଥିବେ
ତିନି ପୁରେ କହ ତାଙ୍କରି ବିହୁନେ
ରହି କି ପାରିବେ ଜୀବେ ।
ରକ୍ଷାବନ୍ଧନର ମହତ ରଖି ମୋ
କାନ୍ତଙ୍କୁ ଦିଅରେ ଛାଡି
ଉପହାର ମୋତେ ଶରଧାରେ ଦିଅ
ନାଲିଆ ରେଶମୀ ଶାଢ଼ୀ ।
ପ୍ରସନ୍ନ କୁମାର ମାଦଳା