ଆକର୍ଷଣ: ଏକ ଲ୍ୟାବ ଏକ୍ସପେରିମେଣ୍ଟ
ଆକର୍ଷଣ: ଏକ ଲ୍ୟାବ ଏକ୍ସପେରିମେଣ୍ଟ
ପ୍ରେମ ଆଉ ଆକର୍ଷଣ କଣ ଏକା କଥା. ?
ନା ଆକର୍ଷଣରୁ ହିଁ ପ୍ରେମ ? ଯଦି ଆକର୍ଷଣ ନ ରହେ .... . ?
ସେଠି ପ୍ରେମ ଆଉ ସମ୍ଭବ କି ?
(Hypotheses to be tested)
Parallel postulates
ଚାଉଳ ଆଉ ଖେଚୁଡ଼ି କଣ ଏକା କଥା. ?
ନା ଚାଉଳରୁ ହିଁ ଖେଚୁଡ଼ି ?
ଯଦି ଚାଉଳ ନ ରହେ .... . ?
ସେଠି ଖେଚୁଡ଼ି ଆଉ ସମ୍ଭବ କି ?
ହେ ପ୍ରେମର ଗାଲିଲିଓ ଆଉ ନିଉଟନ ମାନେ !
କି ଭାବନାରେ ପଡିଗଲେ ?
ଚାଲିଗଲ ଦ୍ଵନ୍ଦରେ ପଡି
ଗୀର୍ଜାର ପାଦ୍ରୀ ମାନଙ୍କ ପାଖକୁ
କିମ୍ବା ପ୍ରେମର ମୁକ୍ତିମଣ୍ଡପରେ
ମୀମାଂସା କରିବାକୁ
ନିଆଁକୁ ଡେଇଁ ପଡୁଥିବା ପତଙ୍ଗ
ପ୍ରେମରେ ମରେ
ନା ଆକର୍ଷଣରେ
ମୋ ଥିଓରୀ
ମୁଁ ରଖୁଛି, ଭୁଲ ହେଲେ
ସମର୍ପଣ କରିଦେବ ମୋତେ
ପାଦ୍ରୀ ଆଉ ମୁକ୍ତିମଣ୍ଡପର
ଶାସ୍ତ୍ରୀ ମାନଙ୍କ ହାତରେ
ଏବେ ବି କହୁଛି
ସବୁବେଳେ କହୁଥିବି ବି
ଆକର୍ଷଣ ଗୋଟିଏ ଫୋର୍ସ
ପ୍ରେମ ଗୋଟିଏ ଶକ୍ତି
ଆକର୍ଷଣର ଦିଗଟିଏ ଅଛି
ପ୍ରେମ ଦିଗହୀନ
ଆକର୍ଷଣ ପ୍ରାବଲ୍ୟରେ
ମପାଯାଏ ତ
ପ୍ରେମ ପରିମାଣରୁ
Hypothesis 1
ପ୍ରେମ ଦିବ୍ୟ ଖେଚୁଡ଼ି
ଆକର୍ଷଣ ଚାଉଳ ପରି
ତାର ଅନେକ ଉପାଦାନରୁ
ଗୋଟିଏ ଉପାଦାନ ମାତ୍ର
ପରମ ସ୍ୱାଦିଷ୍ଟ ଖେଚୁଡ଼ିର
ଆଉ ଏକ ଉପାଦାନ
ହୃଦୟର ମୁଗଡାଲି
Hypothesis 2
ଖେଚୁଡ଼ି ଏକ ମିଶ୍ରଣ ନୁହେଁ
ଭାତ ଆଉ ଡାଲି
ଗୋଳେଇ ଦେଲେ
ଗୋଳା ଭାତ ହୁଏ ସିନା
ପ୍ରେମର ସେ ଦିବ୍ୟ ଖେଚୁଡ଼ି
ହୋଇ ଯାଏ ନାହିଁ
Essential conditions
ଖେଚୁଡ଼ି ହେବାକୁ ହେଲେ
ଚାଉଳ ନିଏ ନିଜ ଭିତରକୁ
ମୁଗର ବାସ୍ନା
ଆଉ ମୁଗବି ନିଜ ଅନ୍ତର୍ଗତ କରିନିଏ
ଚାଉଳର ଆତ୍ମାକୁ
at a given temperature
ଧନ୍ୟବାଦ ଦିଅ ଭଗବାନଙ୍କୁ
ତାଙ୍କ କୃପା ଘିଅ ଧାପେ ପଡିଗଲେ
ଗଳି ଗଳି ସେହି ଖେଚୁଡ଼ିର
ବାସ୍ନା ବୁଲିଯାଏ ।