ତାରାଫୁଲ
ତାରାଫୁଲ
ମନଟାକୁ ମୋର ଫିଙ୍ଗିଦେଲି ଆଞ୍ଜୁଳା
ଆଞ୍ଜୁଳା କରିଯେ ,
ତାରାଫୁଲ ହୋଇ ସିଏ ଫୁଟିଗଲା
ଆକାଶରେ
ତୁମ ବାରିଆଡେ ।
ମେଞ୍ଚାଏ ଅଭିମାନକୁ ଉଡେଇ ଦେଲ ତମେ ଯେ
ଘୋଡେଇଲା ତାରାଫୁଲ ସିଏ
ବର୍ଷିଗଲା ପୁଣି
ଆମ ଚାଳଘରେ ।
ସତରେ
ନିଦାଘର ମେଲଣ
ଅନ୍ତରର ଗୋପନ
ଅକୁହା ସେ ଦହନ
ଫୁରକିନି ଭାସିଗଲା
କହିକେତେ ଅଦିନିଆ ସପନ ।
ଲୁଚେଇଲି ଆଖି ମୋର
କାହିଁକିନା
କାହିଁକିନା ସେହି ତାରାଫୁଲ
ତୁମ ଗଭାରେ
ତୁମ ଅବଗୁଣ୍ଠନରୁ
ଲାଜକଲେ ମତେ
ମୁହଁ ଲୁଚେଇଲେ ମତେ ।
ସିଏ ତୁନି ତୁନି କହୁଥିଲା ମତେ
ନହେଲି ନାହିଁ ତୁମର
ସାଇତିଛିତ ମନକୁ ତୁମର
ମୋ ଅଜଣାତେ
କରି ତାରାଫୁଲ ସତେ ।
ହସିଦେଲି ହୃଦଖୋଲା ହସ
ମୁରୁଜହେଇ ବୁଣିହେଲା
କେତେ ନାଲିନେଳି ଝୋଟିଚିତ୍ର
ତୁମ ପାଦତଳେ
ତୁମ ଚଲାପଥେ ।
ଡରିଲକି ପକେଇବାକୁ
ତୁମ ନହୁଲିପାଦ
ସେହି ଝୋଟିଚିତ୍ର ପରେ
ହଁ ସତରେ,
ଡରିଲକି ପକେଇବାକୁ
ତୁମ ନହୁଲିପାଦ
ସେହି ଝୋଟିଚିତ୍ର ପରେ ।