ଦୁର୍ନୀତି ମୁକ୍ତ ଦେଶ
ଦୁର୍ନୀତି ମୁକ୍ତ ଦେଶ
ବିଶ୍ଵ ସଭ୍ୟତାକୁ ଆଲୋକ ବର୍ତ୍ତିକା ଦେଖାଇ ଆମର ଦେଶ
ଆକର୍ଷଣ କଲା ପରିବ୍ରାଜକଙ୍କୁ ଲୁଟେରା ହେଲେ ଆବେଶ ।
ସତ୍ୟ ନ୍ୟାୟ ତ୍ୟାଗ ତପସ୍ୟା ଆଦର୍ଶ ଦେଖି ହେଲେ ବଶୀଭୂତ
ସମୃଦ୍ଧି ପ୍ରତିଷ୍ଠା ଦେଖି ଏ ଦେଶର ଛଳେ କଲେ ପରାହତ ।
ପରାଶ୍ରୟୀ ହୋଇ ଏ ଦେଶ ଭୁଲିଲା ଆପଣା ଅସ୍ମିତା ଯଶ
ଅଳପ କଷ୍ଟରେ ବହୁ ଉପାର୍ଜନ ଏଥିରେ ହୋଇଲା ବଶ ।
ଦୁର୍ନୀତିର ଚେର ମାଡ଼ିଲା ଏପରି ନୀତି ହୋଇଛି ଦୁର୍ନୀତି
ମୁକତି ପାଇବ ଯୁବ ଶକ୍ତି ଆମ ହୋଇଲେ ସଂସ୍କାରମତି ।
ସରଗକୁ କେହି ନିଶୁଣି ବାନ୍ଧିନି ମରଣଶୀଳ ଏ ଦେହ
ଛୁଞ୍ଚିଟିଏ ଆମ ସାଥିରେ ଯିବନି କାହିଁ ପାଇଁ ଏତେ ମୋହ ।
ଦୁର୍ନୀତିର ନିଶା ତମାଖୁ ସଦୃଶ କର୍କଟ ବ୍ୟାଧି ପରି
କୋରି ଖାଏ ଆମ ସମାଜ ବ୍ୟବସ୍ଥା ମୂଳରୁ ଦେବା ଉପାଡ଼ି ।
ଜାଗ ଯୁବ ଶକ୍ତି ଦୁର୍ନୀତି ମୁକ୍ତ ସମାଜଟିଏ ଗଢ଼ିବା
ସୁଖରେ ବଞ୍ଚିବା ହସି ହସାଇବା ଧରାକୁ ସରା କରିବା ।
-ବିଶ୍ଵେଶ୍ୱର ମାଝୀ-