ପ୍ରତାରଣା

ଆଖି ଶାମୁକାରୁ ମୁକ୍ତା ଦେଇ ମୋତେ

କରିବାକୁ ସୌଦାଗର,

ଦେଇଥିଲ ପ୍ରତିଶ୍ରୁତି ଦିନେ,ଆଜି

ଭୁଲିଛି ମନ ତୁମର।

ସେ ପ୍ରତିଶ୍ରୁତିରେ ଆନନ୍ଦେ ମୋ ମନ

ଗଲା ଆକାଶରେ ହଜି,

ସଉଦାରେ କେତେ ହେଲା ଲାଭ-କ୍ଷତି

ତଉଲୁଛି ବସି ଆଜି।

ମୁକ୍ତା ବୋଲି ଯାହା ଦେଇଥିଲ ସେତ

ପାଲଟିଲା କାଚ ଗୋଟି,

ନକଲି ଶାମୁକା ଭିତର ଖୋଜିଲେ

ମିଳନ୍ତା ମୁକ୍ତା କେଉଁଠି ?!

ତୁମ ପ୍ରତିଶ୍ରୁତି ଭିତରେ ଥିଲା ତ

ପ୍ରତାରଣା ଫଲଗୁ ଧାର,

ଆଇନା ଭାବି ତା ମନକୁ ଭାଙ୍ଗିବା,

କିଏ ଦେଲା ଅଧିକାର ?

ପ୍ରତିଶ୍ରୁତି ଆଉ ପ୍ରତାରଣା ଦିନେ

ଗଲେ ଏକାକାର ହୋଇ,

ନିଶାର୍ଦ୍ଧରେ ଝରେ,ବରଷା ନୁହେଁ ଏ

କାହାର ଲୁହର ନଈ।

ଯାହାକୁ ଖେଳନା ଭାବି ଭାଙ୍ଗିଦେଲା

ତୁମର ଖିଆଲୀ ମନ,

ଖେଳନା ନୁହେଁ ସେ କାହାର ନିରିହ

ହୃଦୟର ପ୍ରିତୀ ଜହ୍ନ।