ନିତ୍ୟ ନିରାମୟ
ନିତ୍ୟ ନିରାମୟ
ଶଯ୍ୟା ତ୍ୟାଗ ପରେ ନିତ୍ୟ କର୍ମ ସାରି କସରତ ଅଳ୍ପ କରି
ପ୍ରାତ ଭ୍ରମଣର ମଜା ନେଇ ଶୁଦ୍ଧ ବାୟୁ ଆହରଣ କରି ।
ଝାଳ ନିଗାଡିଣ ଆସନଟେ ପାରି ସିଦ୍ଧାସନରେ ବସିବ
ପଦ୍ମାସନ ହେଲେ ଆହୁରି ଉତ୍ତମ ମୁକ୍ତ ବାୟୁ ଯଦି ଥିବ ।
ଶାନ୍ତ ସମାହିତ ଚିତ୍ତ ବୃତ୍ତି ସହ ଚକ୍ଷୁ ମୁଦ୍ରିତ କରି
'ଭସ୍ତ୍ରିକା' ଦ୍ବାରା ମଇଳା ଶରୀରୁ ନିଗାଡିବା ଯୋର୍ କରି ।
'କପାଳ ଭାତି' ର ସାହାରା ନେଇଣ ଭିତର କରିବା ସଫା
'ଅନୁଲୋମ ବିଲୋମ' 'ଭ୍ରମରୀ' ସହିତ 'ଉଦଗ୍ରୀବ' ପାଂଚ ଦଫା ।
ତିରିଶ ମିନିଟ୍ ସକାଳୁ ସକାଳୁ ନିଜ ପାଇଁ ଯଦି ଦେବ
ରୋଗ ବ୍ୟାଧି କାହିଁ ଛାଡି ପଳାଇବ ବଇଦ ମଶା ମାରିବ ।
ଫାଷ୍ଟ ଫୁଡ୍ ଖାଇ ମେଦ ବୃଦ୍ଧି କରୁ ଟିଭି ମୋବାଇଲ ସାଥୀ
କସରତ ନାହିଁ ଆଳସ୍ୟକୁ ଆମେ କରୁଛୁ ରୋଗର ପଥି ।
ଅବ୍ୟବସ୍ଥିତ ଜୀବନ ଶୈଳୀ ବସ୍ତୁବାଦର କ୍ରୀତଦାସ
ରୋଗ ବଇରାଗ ନିମନ୍ତ୍ରଣ କରି ପଡିବା ଦଲାଲ ଫାସ ।
ପ୍ରାର୍ଥନା ସଂସ୍କୃତି ସଂସ୍କାର ଭୁଲି ଉତ୍ତେଜନା ମନେ ଭର
ନିରୋଗ ରହିବା ଆଶା କଲେ ତାହା ଧରମକୁ ଆଖି ଠାର ।
-ବିଶ୍ୱେଶ୍ଵର ମାଝୀ-