ସ୍ୱାର୍ଥ ଛାଡ଼ି ଜନପ୍ରିୟ ନେତା ହେବି

ସ୍ୱାର୍ଥ ଛାଡ଼ି ଜନପ୍ରିୟ ନେତା ହେବି

 

ପର୍ଶୁରାମ ବିଶ୍ୱାଳ

 

ବାନ୍ଧିଥିଲି ଆଶା ଦେଖିବି ବୋଲିରେ ତୋ ନବକଳେବର

ମଉଳିଗଲା ମୁଁ ମଉନେ ବସିଛି ଏଇ ରୁଦ୍ଧ କାରାଗାର

ଏଇ ଫଳ ଗୋଟି ମାରି ମୁଁ ପାଇଛି

ଧରମକୁ ଆଖିଠାର ।

 

ଜନସେବା ପାଇଁ ମନ ବଳେଇଲି, ହେଲି ଲୋକ ପ୍ରତିନିଧି

ଲୋଭ ମାତ୍ରା ମୋର ବଢ଼ିଗଲା ଜଗା, ଠକେଇରେ ହେଲି ଛନ୍ଦି

କିଏସେ ବୁଝିବ, କା’ ଆଗେ କହିବି

ମରମ କଥାଟି ମୋର ?

 

ମାନସିକ କରିଥିଲା ମୋ ଘରଣୀ, ଦବ ତୋ ମନ୍ଦିର ନେତ

ତୋର ନୂଆ ରୂପ ଦେଖି ମୁଁ ଥାଆନ୍ତି ସତରେ କଳାସାଆନ୍ତ

ଆଜି ସେଇ ଯୋଗ ହେଲାନାହିଁ ଭୋଗ

ଉଚ୍ଛନ୍ନ ହେଲା ସଂସାର ।

 

ଧନ ପାଇଁ ଆଜି ମୋ ମନ ଚହଲିଗଲା ଆରେ ନନ୍ଦସୁତ

ଜୀବନର ଶାନ୍ତି ହଜିଗଲା ମୋର, ମୁଣ୍ଡେ ଖାଲି ଟଙ୍କାଭୂତ

ମୋ ମାନମହତ ଦାଣ୍ଡେ ଗଡୁଅଛି

ଶୁଣେ ମୁଁ ଛିଇ ଛାକର ।

 

ଡାକୁଛି ତତେରେ ନୀଳାଦ୍ରିବିହାରୀ ଏ ଅନ୍ଧାର କୋଠରିରେ

ଦେଏ ଶକ୍ତି, ଦେଏ ଭକତି ମୋ ପ୍ରାଣେ, ସେ ଭୁଲ୍ ହବନି ଥରେ

ସ୍ୱାର୍ଥ ଛାଡ଼ି ଜନପ୍ରିୟ ନେତା ହେବି

ଲୟ ଥବ ଶ୍ରୀପୟର ।

 

ଗ୍ରା.-ମିତ୍ରସେନପୁର, ପୋ.ଅ.-ଗମୁଁ

ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪

ଫୋନ୍-୯୮୫୩୭୫୯୭୦୦

*****