ଶୀତ ଲାଗେ ହିତ

ନାନା ଜାତି ଫୁଲ ଦେଖି ମୁଁ ପ୍ରଫୁଲ୍ଲ

ମୋହି ନିଏ ମୋର ମତି

ଫୁଲଙ୍କ ପିଛାରେ ଦେଖ ବଗିଚାରେ

କେତେ ଅଳି ପ୍ରଜାପତି ।

କାକର କୁହୁଡି ଛାଡିନାହିଁ ଉଡି

ପହଞ୍ଚିଲେ ଫୁଲ ପାଶେ

ଏ ଶୀତ ସକାଳେ ଜାଣିଲେ ତତ୍କାଳେ

କିଏ କେଉଁଭଳି ବାସେ ।

କୁହୁକ ପରଶେ ଅତୀବ ହରଷେ

ଶିହରେ କୁସୁମ ଦଳ

ଛୁଇଁ ଡିମ୍ବକୋଷେ ମଧୁ ପିଇ ପୋଷେ

ପତଙ୍ଗେ ବି ଟଳମଳ ।

ବିବିଧ ମାନର ପାଚିଲା ଧାନର

ହଳଦିଆ କ୍ଷେତ ହସେ

ଚଷାପୁଅ ସୁଖେ ହସହସ ମୁଖେ

ଅମଳକୁ ଅଣ୍ଟା କଷେ ।

ପକ୍ବଶାଳି ଯଦି ଶଗଡ଼ରେ ଲଦି

ଖଳାକୁ ସେ ବୋହି ଆଣେ

ଧାନମନ୍ଥା ପରେ ସଫା କରି ଘରେ

ମାପି ରଖେ ମାଣେ ମାଣେ ।

ଯାନିଯାତ୍ରା ଥାଟ ପରିବାର ହାଟ

ଗାଆଁଦାଣ୍ଡେ ଯେବେ ଶୋହେ

ଋତୁ ମଧ୍ୟେ ଶୀତ ମନେହୁଏ ହିତ

ସର୍ବଜନ ମନ ମୋହେ ।

କଅଁଳିଆ ଖରା ଭଲ ଲାଗେ ପରା

ନିଆଁ ପୁହା କାଠ ଜାଳି

ଗେଣ୍ଡୁଫୁଲ ତୋଳି ଖାଇ ବରକୋଳି

ପିଲାଏ ମାରନ୍ତି ତାଳି ।

ପ୍ରସନ୍ନ କୁମାର ମାଦଳା