ବହିଠାରୁ ବଡ ସାଥୀ ନାହିଁ
ବହିଠାରୁ ବଡ ସାଥୀ ନାହିଁ
ବେଦ ଶୁଣି ଶୁଣି ଆଗେ ବଢୁଥିଲା ନାମ ଥିଲା ତେଣୁ ଶୃତି
ସ୍ମରଣେ କେବଳ ଜୀବିତ ଥିବାରୁ ନାମ ବହିଲା ସେ ସ୍ମୃତି ।
ସଂସ୍କୃତରୁ ପାଲି ପ୍ରାକୃତ ଆହୁରି ହେଲା ଆଧୁନିକ ଭାଷା
ଅପଭ୍ରଂଶ ରୋକିବାକୁ ଉଦ୍ଭାବନ ଲିପି ହୋଇଲା ଭରସା ।
ତାଳପତ୍ର ପୋଥି ସଂପାଦି ଅଠର ପୁରାଣ ଭଗବତ୍ କଥା
ସହଜ ସୁଗମ ସୁଖପାଠ୍ୟ କଲା ତାକୁ ପୁସ୍ତକ ର ଗାଥା ।
ବହିଟିଏ ନୁହେଁ ଶହେ ସାଥୀର ସେ ସମ ସରି ଉପାଦାନ
ବହି କରେନାହିଁ ଭ୍ରମାୟିତ କେବେ ବହିଟି ଘରର ମାନ ।
ମା କହେ ବାବୁ ପଢିଲେ ଜାଣିବୁ ବାପା ଯୋଗାଅନ୍ତି ବହି
ଛାପାଖାନା ଲଭି ମନ୍ଦିରର ମାନ ନିର୍ଭେଜାଲ ତଥ୍ୟ ଦେଇ ।
ପାଠ୍ୟ ପୁସ୍ତକ ଠୁ ମନୋରଞ୍ଜନ ଗଳ୍ପ ଉପନ୍ୟାସ କାବ୍ୟ
ପୁସ୍ତକରେ ଥାଏ କଳାଠୁ ବିଜ୍ଞାନ ବିଜ୍ଞ ପ୍ରାଜ୍ଞ ବାଣୀ ଭବ୍ଯ ।
ଗୋଟିଏ ଭାଷାର ଅମୂଲ୍ୟ ପୁସ୍ତକ ଭାଷାନ୍ତର ହୋଇବାରୁ
ସାରା ବିଶ୍ବରେ ପରିଚିତ ହୁଏ ଅନୁବାଦକ ଟି ଗୁରୁ ।
କାଳିଦାସ ମାଘ ଭାରବୀ କାଫକା କାର୍ମୁ ସେକ୍ଶପିୟର
ମାକ୍ସିମ୍ ଗର୍କି ରବୀନ୍ଦ୍ର ଉପେନ୍ଦ୍ର ଗୋପୀନାଥଙ୍କ ମନ୍ଦିର ।
ପାଣିନିଙ୍କ ବ୍ୟାକରଣ କରିଅଛି ସଂଜତ ଶୁଦ୍ଧ ସଂସ୍କୃତେ
ପ୍ରତିଟି ଲେଖକ ବ୍ୟାକରଣ ଠାରୁ ଆଡ ହୁଏ ନାହିଁ ପ୍ରତେ ।
ପୁସ୍ତକ ଛାପିବା ଯେତିକି ମହତ ବ୍ୟୟ ସାପେକ୍ଷ ସେତିକି
ଜଂଗଲ ନାଶିଲା ପ୍ରଦୂଷଣ କଲା ବଢିଲା ମୁଣ୍ଡ ବଥା କି !
କମ୍ପ୍ୟୁଟର ଠାରୁ ମୋବାଇଲ୍ ଯାଏ ନେଲା ପୁସ୍ତକର ସ୍ଥାନ
ଉଇକିପେଡିଆ ଗୁଗୁଲ ଦେଉଛି ସୂଚି ଠୁ ରକେଟ ଜ୍ଞାନ ।
ଗୋଟିଏ ଯନ୍ତ୍ରରେ ସକଳ ଭାଷାର ସମାହାର ବିଶ୍ୱାୟନ
ଗୁଗୁଲ କରୁଛି ଭାଷାନ୍ତର ଅନୁବାଦକର ନାହିଁ ସ୍ଥାନ ।
ବହିଟିଏ ଆଜି ପରିଚୟ ତା'ର ହଜାଇବା ସନ୍ଧି କ୍ଷଣେ
ତଥାପି ବହିର ଆଦର କମିନି ଲୋଡୁଛନ୍ତି ବିଜ୍ଞ ଜନେ ।
ଅଧିକ ପଢିବ ଅଳପ ଲେଖିବ ଭଲ ଲେଖକର ମାନ
ବହିଟିଏ ତେଣୁ ଲେଖକର ସାଥୀ ପାଠକର ଗୁରୁ ଜ୍ଞାନ ।
ସମାଜ ଯାଉଛି 'ଗୋ ଗ୍ରୀନ୍' ଆଡେ ଛାପିବା ହେଲାଣି ପାପ
ସାଇତିବା କିଣି ବହିଟିଏ ଆଗୁଁ ପୁସ୍ତକ ଟି ମହାତପ ।
ବିଶ୍ୱେଶ୍ଵର ମାଝୀ