ସତ୍ୟ ହିଁ ପ୍ରକୃତ ବନ୍ଧୁ
ସତ୍ୟ ହିଁ ପ୍ରକୃତ ବନ୍ଧୁ
ବିଚିତ୍ର ଏ ମାୟାର ସଂସାର
ବାସ୍ତବ ବନ୍ଧୁକୁ ଯିଏ ଚିହ୍ନିପାରେନାହିଁ
ବନ୍ଧୁ ଭାବି ନିଏ ସଦା ଆଶ୍ରୟ ମିଛର ।
ବ୍ୟଭିଚାରୀ ହୁଏ ଆଜି ସ୍ୱାର୍ଥପର ନର
ମହାନ ସାଜିଥାଏ ଅପକର୍ମ କରି
ସତ୍ୟ ଭଳି ବନ୍ଧୁତାକୁ ଶତ୍ରୁ ଭାବି ନିଜର ।
କାମନାର ସାଗରରେ ହୋଇ ଉବୁଟୁବୁ
ଭୁଲିଯାଇ ସତ୍ୟ ପଥ ଧାଇଁ ଯାଏ
ମିଛର ଶକ୍ତି ବଳରେ ଲଙ୍ଘିବାକୁ ସବୁ ।
ଆଲିଙ୍ଗନ କରି ଅଧର୍ମକୁ ପ୍ରାଣୀ
ସତ୍ୟର ପଥରୁ ହୁଏ ନିବୃତ୍ତ
ମିଛ ବନ୍ଧୁ ପ୍ରେମେ ପଡି ଜାଣିପାରେ ନାହିଁ କିଏ ବାଟ ଆଉ କେଉଁଟା ଅବାଟ ।
ସତ୍ୟ ହିଁ ପ୍ରକୃତ ବନ୍ଧୁ, ଭୁଲିଯାଏ କରିବାକୁ ବିଶ୍ଵାସ
ମାୟାମୃଗ ପରି ଧାଇଁ ମରୀଚିକା ପଛେ
ନିଜେ ହିଁ ଶେଷେ କରେ ନିଜ କୁଳନାଶ ।
ସତ୍ୟ ସଙ୍ଗେ ବନ୍ଧୁ ବାନ୍ଧି ଗଲେ ସତ୍ୟ ପଥେ
ନଫୁଟିବ ପାଦରେ ତ କଣ୍ଟାଟିଏ କେବେ
ସତ୍ୟ ରାସ୍ତା କଷ୍ଟ ସିନା ଫଳ ତା ଅମୃତ
ତାହାରି ବଳରେ ପ୍ରାଣୀ ପୂଜା ପାଏ ନିତ୍ୟ ।
ସତ୍ୟ ପରି ବନ୍ଧୁ ନାହିଁ କେହି ଏ ମହୀରେ
ଯିଏ କେବେ ସାଙ୍ଗ ଦେବ ମସାଣି ଭୁଇଁରେ
ମୃତ୍ୟୁ ପରେ ମଧ୍ୟ ସତ୍ୟ ସାଙ୍ଗ ଦେଇଥାଏ
ତାହାରି ବଳରେ ପ୍ରାଣୀ ବୈକୁଣ୍ଠକୁ ଯାଏ ।
ରାଜଦ୍ୱାରେ ସତ୍ୟ ଥାଏ,ଶ୍ମଶାନେ ବି ସତ୍ୟ
ପ୍ରବାସେ ବି ସତ୍ୟ ଦିଏ ବଢ଼ାଇ ବନ୍ଧୁତ୍ୱର ହାତ
ସତ୍ୟ ହିଁ ପରମ ତପ , ବନ୍ଧୁତ୍ୱରେ ଶ୍ରେଷ୍ଠ
ଯେତେ ବନ୍ଧୁ ଥିଲେ ଥାଉ, ସତ୍ୟ ବିନା ଜୀବନଟା କଣ୍ଟକିତ ପଥ ।
ରୋଜା ପଣ୍ଡା
ପୂର୍ଣ୍ଣାନନ୍ଦ ଭବନ , ନେତାଜୀ ନଗର, ମଧୁପାଟଣା