ସନେଟ -୩୯
ସନେଟ -୩୯
ମମାନ୍ତେ
କବିସୌରଭ ଅନୁପ ସିଂହ ଦେବ
ରାଜା ଖଡ଼ିଆଳ
ପ୍ରାଣ-ତରୀ କାଳ-ସିନ୍ଧୁ କୂଳେ ଲାଗିଲାଣି
ବାହି ବାହି ତନୁ ମନ ଅବଶ ହେଲାଣି ।।
ପ୍ରିୟତମେ ! ଦିଅ ଗଳେ ମଙ୍ଗଳ ମନାସି
ସ୍ୱହସ୍ତ ଗ୍ରଥିତ ମାଳା ଯିବି ହସି ହସି ।।
ନ ଜାଳ ପ୍ରମୋହ-ଦୀପ ହୃଦୟ-ମନ୍ଦିରେ
ଲଭିବ ସେ ତ ଜୀବନ-ସଳିତା ସରିଲେ ।।
ମାନସ-ସରେ ଫୁଟିଛି ଯେଉଁ ହର୍ଷ-ଅବ୍ଜ
ଲୁଟିବ ଦେଖ ଆସୁଛି ଦିବ୍ୟ-ଗଜରାଜ ।।
ଚାହିଁ ବସିଥିଲି ପଥ ଏହାଙ୍କ ଜୀବନେ
ଯାଉଛି ବିଦାୟ ଦିଅ ତାଙ୍କ ନିମନ୍ତ୍ରଣେ ।।
ପାରିବନି ବାନ୍ଧି ମୋତେ ପ୍ରେମ ଡୋରେ ସହି !
ଯାଦୁକର ସେ ଯେ ଦେବ ଅକ୍ଲେଶେ ଫିଟାଇ ।।
ନ ବର୍ଷାଇବ ଲୋତକ ପ୍ରାଣେ ହେବ କ୍ଳେଶ
ସଦଗତି ଶାନ୍ତି ଦେବାକୁ ଭଜିବ ସୁରେଶ ।।
ସମାପ୍ତ