ଅଗ୍ନିସମ୍ଭୁତା
ଅଗ୍ନିସମ୍ଭୁତା
ଯୋଗମୁଦ୍ରାମୟୀ ପ୍ରେମାନନ୍ଦମୟୀ
ଜଗତଜନନୀ ମାଆ
ଶାନ୍ତ ରୂପ ତେଜି ହୁଙ୍କାରି ଗରଜି
ଅବତରି ଆସି ଯାଆ ।
ହଜାର ହଜାର ମହିଷା ଅସୁର
ମାତିଛନ୍ତି ଏଠି ଯୁଟି
ଦିବସେ ହାଟରେ ବାଟରେ ଘାଟରେ
ଇଜ୍ଜତ ନିଅନ୍ତି ଲୁଟି ।
ଶୁମ୍ଭ ଓ ନିଶୁମ୍ଭ ଭିଡିଛନ୍ତି ଦମ୍ଭ
ଭାରତ ଭୂମିରେ ଆଜି
ରକ୍ତବୀଜ ଭଣ୍ଡ ସାଥେ ଚଣ୍ଡମୁଣ୍ଡ
ପୀଡନ୍ତି ବିଧର୍ମୀ ସାଜି ।
ଭୂସ୍ଵର୍ଗ ବିଚ୍ଛିନ୍ନ ନିମନ୍ତେ ଉଚ୍ଛନ୍ନ
ଗୁଳିଗୋଳା ଫୁଟେ ନିତି
ବଢି ମାତୃ ଅନ୍ନେ ଅରି ଗୁଣଗାନେ
ଛନ୍ତି ନାହିଁ ତିଳେ ଭୀତି ।
କୁମାରୀତ୍ବ ଯେତେ ପଣ୍ୟଦ୍ରବ୍ୟ ମତେ
ହେଉଅଛି ବିକା କିଣା
ପାଦେ ଦିଅ ଦଳି ଯେତେ ଦୈତ୍ୟ ବଳୀ
ବୋଲାନ୍ତି ଜଗତଜିଣା ।
ମା'ଗୋ ଭଗବତୀ କରୁଛି ବିନତି
ଅନଳୁ ଆସ ସମ୍ଭବି
କରିଲେ ତୁ ହେଳା ବୁଡିବ ଗୋ ଭେଳା
ତୁ ପରା କାଳଭୈରବୀ ।
କରାଳିନୀ କାଳୀ ଏବେ ତୋର ପାଳି
ବ୍ୟାଘ୍ର ବାହନରେ ବସି
ଏ କଳାବଜାରୀ ନିଶା କାରବାରୀ
ଗଡକୁ ଦିଅ ମା' ଧ୍ବଂସି ।
ତୋ ବନ୍ଦନା ପାଇଁ ବେଳ ଆଉ କାହିଁ
ଆରତେ ଡାକୁଛି ମାଆ
ଆସ ଅବତରି ପ୍ରହରଣ ଧରି
କଳୁଷ ନାଶନେ ଯାଆ ।
ଉଗ୍ର ରୂପେ ଚଳି ମାଗିଲେ ମା' ବଳି
ଶୀର୍ଷ ମୋ ବଢାଇ ଦେବି
ସଙ୍କଟ ତାରିଣୀ ଅଭୟ ଦାୟିନୀ
ନଇଁଛି ଚରଣେ ସେବି ।
ପ୍ରସନ୍ନ କୁମାର ମାଦଳା
ଘର ନଂ - ଏଫ୍ / ୧୩
ସେକ୍ଟର - ୪
ରାଉରକେଲା - ୭୬୯୦୦୨
ଦୂରଭାଷ - ୭୯୭୮୧୯୨୨୨୭