ବର୍ଗ ବନ୍ଧନୀ
ବର୍ଗ ବନ୍ଧନୀ
ବର୍ଗ ବନ୍ଧନୀ
କିଛି ନଗଦ ଅନର୍ଥ
ଅଳପ ପ୍ରତିଷ୍ଠା ତମ
ସାମାଜିକ ବର୍ଗ ବନ୍ଧନୀର
ଆଉ ଫିଟି ଯାଉଥିବା
ତମ ପଛପଟର ଆଭିଜାତ୍ୟ
ସେଦିନ ଅନ୍ଧ କରିଦେଲା ନା
କଜଳ ବୋଳା ବଡବଡ
ତମ ଚିଲା ଆଖି ଦି'ଟା ?
ଆଉଥରେ ତତ୍ପର
ସମାନ ଆଭିମୁଖ୍ୟର କାହାକୁ
ମାୟାବିନୀ ଇନ୍ଦ୍ରଜାଲେ ତମ
ଛଂଦି ଆଣି ବାଂଧି ନେବାକୁ
ତଥାକଥିତ ବନ୍ଧନୀ ଭିତରେ ?
ରଙ୍ଗୀନ ପ୍ରଚକ୍ଷୁ ଲଗାଇ
ପରଦା ଟଙ୍ଗା ଗାଡ଼ିରେ ବସିଲ ସିନା
ଜୀବନର ମୂଲ୍ଯ ଭୁଲିଗଲ ।
ଶୁଣିଥିଲି ନିଦ ବଟିକା ଖାଇ
ବୁଝିଲଣି କୁଆଡେ
ତତ୍ତ୍ବ ଯାକ ବସ୍ତୁମୟ ନୁହେଁ ବୋଲି,
ବନ୍ଧନ ହୃଦୟର କି ଅନୁଭବର
ଶାଶ୍ବତ ପ୍ରେମ ବୋଲି ।
ଏଥିପାଇଁ ମୁଁ ଅବୋଧ
ଏବେ ବି ମୁକ୍ତ ବିହଙ୍ଗ
ସିଟି ବଜାଇଲେ କି ଗୀତଟେ ଗାଇଲେ
ଛାଏଁ ଧରା ଦେବି,
ହେଲେ ପଞ୍ଜୁରୀରେ ନୁହଁ
କି ତମ ବର୍ଗ ବନ୍ଧନୀରେ ନୁହଁ ।
କବି - ଶ୍ରୀଯୁକ୍ତ ପ୍ରସନ୍ନ କୁମାର ମାଦଳା